Pavlodar oblysyna Túrikmenstannan 11 otbasy kóship keldi
Óńirimizge 11 otbasynyń quramynda 46 adam keldi. «Dostyq» úıinde ótken jıynda ár aýdan, qalalardyń jumyspen qamtý ortalyqtarynyń basshylary kelip, qandastarǵa bos jumys oryndary, qandaı jaǵdaı jasalatyny týraly tanystyrdy.
Dúnıejúzi qazaqtary qaýymdastyǵy «Otandastar qory» Pavlodar oblystyq fılıalynyń basshysy Bolat Zaýyt jyl basynan beri Reseı, Monǵolııa, Ózbekstan elderinen 216 adam kóship kelgenin atap ótti.
«Bıyl Pavlodar oblysyna shet elderden keletin qandastarǵa 800 adamǵa kvota bólingen. Al, Túrikmenstannan bıyl 427 qandas keledi dep kútilýde. Sonyń bir bóligi mine kelip otyr. Bul otbasylar Túrikmenstannan Qazaqstanǵa vızany Pavlodar oblysyna barý úshin alǵan. Sondyqtan qazir tek osy oblysqa qonystanyp, kem degende bes jyl turýy tıis. Olaı bolmasa, shara qoldanylady. Onyń bárin eskertip aıttyq», - dedi Bolat Zaýyt.
Onyń aıtýynsha, Qazaqstanǵa qonys aýdarǵan shet elderdegi qazaqtar aldymen JSN (jeke sáıkestendirý nómirin) alýy tıis. Ol 1 kúnde beriledi. Keıin «Qandas» mártebesin alady. Ol 4 jumys kúni ishinde beriledi. Sodan keıin osy óńirge turaqty tirkeýge turyp, bir mezette Qazaqstan azamattyǵyna qujat tapsyrady. Osy úrdisterden keıin kvotaǵa qujat tapsyrady.
Pavlodar oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Almıra Dısıýpova qandastarǵa kvota boıynsha qandaı kómek kórsetiletinin aıtty.
«Qonys aýdarǵan otbasylardyń ár múshesine 70 AEK mólsherinde aqshalaı kómek beriledi. Bul 200 myń teńgeden asady. Sondaı-aq qonystanǵan jerlerine qaraı 1 jyl boıy aı saıyn baspana jaldaýǵa sýbsıdııa alady. Eger qalalyq jerde ornalassa, 61 myńnan 91 myń teńgege deıin, aýyldyq jerde 45 myńnan 64 myń teńgege deıin alady. Naqty soma otbasyndaǵy adam sanyna baılanysty. Sondaı-aq 1 jyldyq somany bir jolda alyp, sol baspanany satyp alýǵa jumsaýǵa bolady», - dedi Almıra Dısıýpova.
Basqarma basshysy oblysta qandastarǵa arnalǵan boljamdy karta bar ekenin aıtty. Onda 111 eldi meken belgilenip, 1 myńnan astam bos jumys orny anyqtalǵan.
«Kelgen otbasylar qazir mamandyqtary men bos jumys oryndaryna qaraı qaı aýdanǵa baratynyn anyqtaıdy. ıAǵnı, turatyn jerdi ózderi tańdaıdy. Bizde ár aýdanda kvota bar. Qazirgi ýaqytta sál erterek kóship kelgen otbasy Aqsý aýyldyq aımaǵyn tańdap, turaqtandy. Otaǵasy gaz-elektr dánekerleýshi eken. Sol mamandyǵy boıynsha jumys jasaýda», - dedi Almıra Dısıýpova.
Basqarma basshysynyń aıtýynsha, Túrikmenstannan kóbine tehnıkalyq mamany bar, sonyń ishinde gaz-elektr dánekerleýshiler kelýde. Al, oblysqa negizi densaýlyq saqtaý, bilim salasynyń mamandary kerek, degenmen ázirge ondaı mamandar kelip jatqan joq.
Óńirimizge qonys aýdarǵandardyń biri Maqsat Súıesınov aýyldyq jerlerdiń birine baryp, mal sharýashylyǵymen aınalysýdy josparlaýda.
- Túrikmenstannyń Balqanabat ólkesinen keldik. Otbasymyzda tórt adambyz. Ulym men qyzym bar. Qyzym 8-synypta oqıdy. Óz mamandyǵym – elektrık. Jubaıym úı sharýasynda. Munda Maı aýdany men Aqqýly aýdanynyń birine barsam dep otyrmyn. Mal sharýashylymen aınalysýǵa nıet bar. Ol jaqta da mal ustaǵanmyn. Ata-anam osy Qazaqstanda. Pavlodar oblysy jaqsy eken. Qazaqstan keń baıtaq jer ǵoı. Qaı jeri bolsa da maǵan yńǵaıly, - dedi Maqsat Súıesınov.
1661581668858.jpg
Aıta keteıik, Túrikmenstandaǵy qandastar 2020 jyly Qazaqstanǵa kóshýge nıet bildirgen. Onda 20 myńǵa jýyq qazaq turady. Alaıda, pandemııaǵa baılanysty keıinge shegerilgen. Kóbi ońtústik óńirlerdi tańdaǵan. Qazirgi kezde elimizde qoldanystaǵy saıasatqa baılanysty qandastardy soltústik óńirlerge baǵyndattaýda
