Pavlodar oblysyna OQO-dan 50 otbasy qonys aýdarǵan
ASTANA. QazAqparat - Bıylǵy jyly 1 qazanda Pavlodar oblysyna Ońtústik Qazaqstan oblysynan 50 otbasy qonys aýdarǵan, dep habarlaıdy pavlodarnews.kz.
Bul týraly búgin jastar bastamalaryn damytý ortalyǵynda «Serpin-2050» baǵdarlamasy aıasynda bilim alyp jatqan jastardyń qatysýymen ótken kezdesýde oblystyq jumyspen qamtý jáne áleýmettik baǵdarlamlar basqarmasy kóshi-qon bóliminiń basshysy Merýert Esembaeva aıtty.
«Bıyl 60 otbasyn kóshirý josparlanǵan bolatyn, - deıdi Merýert Esembaeva. - 50 shańyraqtyń altaýy - Pavlodar qalasyna, bes otbasy - Aqsý men Ekibastuzǵa, qalǵany aýyldyq aımaqtarǵa qonystandy. Qalǵan nıet bildirgen on otbasy kezekte tur. Aýyl sharýashylyǵymen aınalysýǵa yntaly adamdarǵa jer ýchaskeleri usynylyp, aýdan ortalyǵyna jáne qalalarǵa jaqyn jerlerge jiberiledi».
Baǵdarlama aıasynda kez kelgen azamat óz qalaýymen baratyn jerdi tańdap alady. Bul qatarǵa ózdiginen jumyspen qamtylǵandar, jastar, jas otbasylar jatady. Birinshi talap - otbasynda kem degende bir adamnyń qandaı da bir mamandyq ıesi bolýy tıis. Jyl basynda aýdandar men qalalarda bizdiń oblysqa qajet mamandyqtar tizimi bektiledi. Máselen, bıyl bilim berý (aǵylshyn tili, matematıka pánderiniń muǵalimi), densaýlyq saqtaý jáne aýyl sharýashylyǵy salasyna 150-den astam maman qajet.
Bólim basshysy 2017 - 2021 jyldarǵa arnalǵan «Nátıjeli jumyspen qamtýdy jáne jappaı kásipkerlikti damytý» baǵdarlamasynyń eńbek kúshiniń utqyrlyǵyn arttyrý baǵytyna keńinen toqtalyp ótti.
Úkimet tarapynan kóship kelgen adamdarǵa 35 AEK kóleminde bir rettik tólemaqy bekitilgen jáne on eki aıdyń ishinde baspana jaldap turýǵa qarajat bólinedi. Úı satyp alýǵa nıet bildirgenderge kelisimshart negizinde shaǵyn sýbsıdııa, áleýmettik sala qyzmetkerlerine arendalyq úı beriledi. Oralmandar men ishki qonys aýdarýshylarǵa bólinetin kvota sany kelesi jyly 460 otbasyna deıin eselengen.
Bul shamamen 1800-den astam adam. Jalpy bes jyldyń ishinde Pavlodar oblysyna jumys kúshi artyq óńirlerden 15 000-nan astam otbasyn kóshirý josparlanyp otyr. Jastar bastamalaryn damytý ortalyǵynyń basshysy Saıat Júsipbaevtyń aıtýynsha, memlekettik baǵdarlama aıasynda bilim alyp jatqan jastardyń oqýdy aıaqtaǵannan keıin osynda qalyp eńbek etýi úshin mundaı kezdesýler qazan aıynyń ár beısenbi kúni uıymdastyrylady.
«Tamyz aıynan bastap Qazaqstan turǵyn úı qurylys jınaq bankimen jastarǵa baspana alý úshin tegin esepshot ashý maqsatynda kelisimshartqa otyrǵan bolatynbyz. Búgindi kúni óńirde 14-29 aralyǵyndaǵy úsh myńnan astam adamǵa kómek kórsetildi. Sonymen qatar serpindik 1600-den astam stýdenttiń jartysynda bolsa da esepshot ashyp berýdi josparlap otyrmyz», - deıdi Saıat Júsipbaev.
