Pavlodar oblysyna Mońǵolııadan 13 otbasy kóship keldi
«Dúnıejúzi qazaqtary qaýymdastyǵynyń Tóraǵasy, Qazaqstan Respýblıkasy Tuńǵysh Prezıdenti – Elbasy Nursultan Nazarbaevtyń shet elde júrgen qandastar taǵdyrynan bir sátte qol úzbeı, tikeleı aralasýynyń negizinde baýyrlarymyzdyń týǵan jerine qonys aýdarý legi jalǵasýda. Dúnıejúzi qazaqtarynyń qaýymdastyǵy jáne «Otandastar qory» KEAQ-nyń pılottyq jobasy aıasynda Mońǵolııanyń Qobda, Baıan-Ólgeı aımaqtarynan Qazaqstandaǵy týystaryna qosylyp, urpaqtaryn atamekenge jetkizý maqsatynda Pavlodar oblysyna kóp balaly 13 otbasynyń 80 adamy kóshirildi», delingen habarlamada.
Aıta keterligi, Qazaqstanǵa birjolata kóship kelýge nıet bildirgen qandastarymyz negizinen áleýmettik, turmystyq jaǵdaıyna baılanysty ózdiginen kóship kele almaıtyn edi. Sondyqtan, bul ıgi shara «Otandastar qory» KEAQ–nyń qoldaýymen Dúnıejúzi qazaqtarynyń qaýymdastyǵy Pavlodar oblystyq fılıalynyń uıymdastyrýymen iske asyryldy.
«Kóship kelgen qandastar arasynda 13 balany ómirge ákelip ósirip, jetkizgen ardaqty ana Qaısha apamyz óziniń qolyndaǵy kenje uly men kelininiń 6 balasymen birge atamekenge kelip otyr. Sondaı-aq, jasóspirim oqý jasyndaǵy 46 bala, 4 stýdent, 1 zeınetker, eńbek jasyndaǵy 29 azamat kóship keldi. Olardyń ishinde aǵylshyn tili, bastaýysh synyp muǵalimderi, tehnıka mamandary, mehanızator, mal dárigeri, medıtsına salasynyń mamany, basqada arnaıy oqý ortalyqtaryn bitirgen tájirbıeli mamandyq ıeleri bar», - delingen baspasóz baıanynda.
Mońǵolııadan kóship kelýshi otbasylar múshelerin jáne otbasynyń turmysqa qajetti qoldanystaǵy múlik, jeke úı júkterin Reseı Federatsııasynyń Altaı ólkesiniń Tashanta keden beketi arqyly shekaradan alyp ótýine baılanysty keleńsiz jaǵdaılardy boldyrmaý úshin Dúnıejúzi qazaqtary qaýymdastyǵynyń bas menedjer Altaı Almat Tursynbekuly jáne «Dúnıejúzi qazaqtarynyń qaýymdastyǵy» RQB-niń Pavlodar oblystyq fılıalynyń basshysy Bolat Zaýtuly men «Otandastar qory» RF Omby qalasyndaǵy Qazaqstan Respýblıkasy Konsýly qyzmetkerleriniń kómegine júgingen bolatyn. Osyndaı birlesken sharalardyń nátıjesinde qandastarymyz aman esen elge jetkizilip otyr.
Kóship kelýshiler Pavlodar qalasyndaǵy «Qonystanýshylar men oralmandardy ýaqytsha beıimdeý ortalyǵynda» bir apta bolyp, Pavlodar qalasynyń tarıhı oryndary murajaılarymen tanysyp, birqatar quqyqtyq keńes alyp, qujattaryn rásimdep, medıtsınalyq tekserýden ótedi.
Odan keıin, Ekibastuz qalasynyń, akedemık Álkeı Marǵulan atyndaǵy aýylyna 9 otbasy, Pavlodar aýdanyna 2 otbasy, Aqsý qalasynyń Dostyq, Aqjol aýyldaryna 2 otbasy, Tereńkól, Maı aýdandaryna qonystanady dep josparlanýda. Kóship kelgen otbasylary túgeldeı bıylǵy jylǵy oralmandardyń óńirlik kvotasyna enip, memleket tarapynan ár adamǵa 88 375 teńgeden bir jyl boıy úı jaldap turatyn qarajat beriledi. Balalary oqý oryndaryna, eńbek jasyndaǵylar jumysqa ornalasady.
