Pavlodar oblysyna koronavırýsqa qarsy vaktsınanyń 80 myń dozasy bólinedi
PAVLODAR. QazAqparat - Óńirde aldymen 9 myńǵa jýyq medıtsına qyzmetkerine koronavırýsqa qarsy vaktsına egiledi, dep habarlaıdy Pavlodarnews.kz.
Oblystyq densaýlyq saqtaý basqarmasynyń basshysy Aıdar Seıitqazınov Qazaqstanda reseılik «Spýtnık V» vaktsınasyn shyǵarý josparlanyp jatqanyn atap ótti. QR Densaýlyq saqtaý mınıstrligi Pavlodar oblysyna 80 myń doza bóledi. Vaktsına 1 aqpannan bastap kezeń-kezeńimen jetkiziledi.
«Vaktsına Sultanov atyndaǵy oblystyq aýrýhana bazasyndaǵy muzdatqyshqa jetkiziledi. Onda 2,2 kýb metrlik muzdatqysh bar. Bul birinshi kezeńdegi vaktsınany qabyldap alýǵa jetkilikti. Qosymsha 1,2 kýb metrlik 3 muzdatqysh satyp alynady», - dedi Aıdar Seıitqazınov.
Basqarma basshysynyń aıtýynsha, KVI-ǵa qarsy vaktsınalaýdy júrgizý úshin medıtsına qyzmetkerleri oqytyldy. Oblysta 1125 qyzmetker vaktsınalaýmen aınalysady. Onyń ishinde dárigerler men ortasha deńgeıdegi qyzmetkerler bar.
«Oblysta vaktsınalanatyn azamattar tizimi - 85704. Bul naqty san emes. Sondyqtan ózgerýi múmkin. Vaktsınany ýaqytynda egý vaktsınaǵa qatysty klınıkalyq kórsetkishterge, adamdardyń óz erkimen egilýine, egiletinderdiń epıdemıologııalyq statýsyna baılanysty, - dedi Aıdar Seıitqazınov.
Vaktsınalaýǵa aldymen medıtsına qyzmetkerleri, pedagogtar, quqyq qorǵaý jáne kúsh qurylym qyzmetkerleri, memlekettik organdardyń ókilderi, stýdentter, jabyq balabaqshalardyń mamandary kiredi. Sondaı-aq sozylmaly aýrýlary bar adamdar kiretin bolady.
«Aqpanda alǵashqy bolyp jetkiziletin vaktsına medıtsına mamandaryna egiledi. Jospar boıynsha 9 myńǵa jýyq medıtsına qyzmetkeri qamtylady. Munda statsıonarlardyń jáne jedel járdem qyzmetkerleri kiredi», - dedi basqarma basshysy.
Aıdar Seıitqazınovtyń aıtýynsha, vaktsınalaýǵa daıyndyq úshin oblysta aqparattandyrý jumystaryn júrgizý kerek. Oǵan qosa, turǵyndar suraqtaryna jaýap alý úshin jedel jeli qurý qajet.
