Pavlodar oblysy: Turaqtandyrý qorynda 6,9 myń tonna ónim bar
Bul jaıly óńirlik kommýnıkatsııalar qyzmetinde ótken baspasóz máslıhatynda oblystyq kásipkerlik jáne ındýstrııalyq-ınnovatsııalyq damý basqarmasynyń basshysy Ernur Jáýtikbaev málim etti.
- Bizdiń basty mindetimiz - azamattardyń tynys-tirshiligin azyq-túlik taýarlarynyń negizgi túrlerimen úzdiksiz qamtamasyz etý. Áleýmettik mańyzy bar azyq-túlik taýarlarynyń baǵasyn ustap turý maqsatynda oblysta birqatar sharalar qabyldanýda, - dedi Ernur Jáýtikbaev. - Baǵa jaǵdaıyna kúndelikti monıtorıng júrgiziledi. Osy jumys sheńberinde baǵanyń ósýine jedel den qoıý úshin ákimdikter men kásipkerlik jáne ındýstrııalyq- ınnovatsııalyq damý basqarmasy janynan «Jedel jeliler» jáne «WhatsApp arnalary» quryldy. Sonymen qatar, azamattar «109» qyzmetine júgine alady.
Onyń aıtýynsha, turaqtandyrý qory «Kóterme qoıma» rejıminde jumys isteıdi, ıaǵnı qajetti ónimdi turaqty negizde satý jáne satyp alý.
Turaqtandyrý qorynyń ónimderi «Turaqtandyrý qorynyń seriktes dúkenderi» 206 saýda núktesi arqyly satylady.
Spıker turaqtandyrý qoryndaǵy qarajat jetkilikti, qajet bolǵan jaǵdaıda turaqtandyrý qoryn tolyqtyrý úshin bıýdjet qarajaty qosymsha bólinetin bolady dep sendirdi.
«Aınalym shemasy» sheńberinde nesıe berýge 1,85 mlrd teńge kózdelgen, onyń 632 mln teńgesi shekti normadan aspaıtyn baǵalar boıynsha taýarlardyń 13 ataýyn satý úshin 7 kásiporynǵa berildi.
Sondaı-aq, ózara yntymaqtastyq týraly memorandýmdarǵa qol qoıyldy.
- Oblystyń 33 aýyl sharýashylyǵy taýaryn óndirýshilerimen qysqy-kóktemgi kezeńde belgilengen baǵamen satý úshin 30 myń tonna kartop jáne 6 myń tonna sábiz otyrǵyzý, oblystyń 4 iri saýda jelisimen (Smoll, Grınvıch, Inmart, Lıder), onyń sheńberinde jeliler kartop pen sábizdi 125 teńgege deıingi baǵamen satatyn bolady, - dedi Ernur Jáýtikbaev.
Sonymen qatar, 7 sút kásiporyndarymen («Pavlodarmoloko» JShS, «Molkom Pavlodar» JShS, «Sút» AQ, «Best Milk» JShS, «FreshMilk» JShS, «sút ónimderi» ÓF, «Ragtaım» ShQ) jáne 11 sút-taýar fermalarymen sút ónimderine baǵanyń kóterilmeýi týraly memorandýmǵa qol qoıyldy.
Basqarma basshysynyń pikirinshe, atalǵan barlyq sharalar baǵanyń turaqtylyǵyn qamtamasyz etýge múmkindik beredi.