Pavlodar oblysy:Tıimsiz agro-tehnıkalyq kolledjderdi biriktirý josparlanýda
PAVLODAR. QazAqparat - Túlekteri mamandyqtary boıynsha eńbek etpeıtin kásiptik jáne tehnıkalyq bilim beretin uıymdardy oqý sapasyn joǵarylatý úshin biriktirmek. Osylaısha kolledjderde óńirimizge kerekti mamandardy daıyndaı bastaıdy, dep habarlaıdy pavlodarnews.kz.
Pavlodar oblysynyń ákimi Bolat Baqaýovtyń qatysýymen Baıanaýylda ótken jıynda aýyldyq jerlerdegi paıdasy az kolledjderdiń máselesi talqylandy. Óńir basshysy birden KjTBB uıymdardyń kórsetkishi - túlekteriniń jumysqa ornalasýymen esepteletinin aıtty. Al bul baǵytta aýdandardaǵy kolledjderdiń kóbisinde kórsetkish tómen.
«Baıanaýyl agrarly-tehnıkalyq kolledjin alaıyq, ishinde bireýi de óz mamandyǵy boıynsha eńbek etpeıdi. Olar: aspazshylar, dánekerleýshiler, elektr mehanıkteri. Sońǵy 5 jylda túlekterdiń 39 paıyzy ǵana jumysqa ornalasqan. Onyń tek 19 paıyzy mamandyqtary boıynsha jumys jasaıdy. Agrarly-tehnıkalyq kolledjderdiń barlyǵynda derlik bundaı jaǵdaı oryn alyp otyr. Oǵan qosa, bir bilikti mamandy daıyndaý úshin jyl saıyn oblystyq bıýdjetten 1,2 mıllıon teńgeden astam qarjy jumsalady»,- dedi oblys ákimi.
Bolat Baqaýov Pavlodar tústi metallýrgııa jáne Aqsý qara metallýrgııa kolledjderin úlgi qyldy. Olardyń túlekteriniń 95 paıyzy óńirdegi metallýrgııalyq kásiporyndarǵa jumysqa ornalasady. «Jýyrda Sharbaqty agrarly-tehnıkalyq kolledjin tekserý barysynda 6 qyz balanyń temir ustasy jáne dánekerleýshi boıynsha bilim alyp jatqany anyqtaldy», - dedi óńir basshysy. «Olar oqýyn aıaqtaǵannan keıin mamandyqtary boıynsha jumys jasaı ma? Sózsiz, olaı etpeıdi. Jastar arasynda kásiptik baǵdarlaý jumystary júrgizilýi qajet. Ásirese, mektep deńgeıinde júrgizý kerek. Bozshakóldegi taý-ken baıytý kombınatyna qarasańyzdar, búginde ol jerde Qaraǵandy, Astana, tipti Qyrǵyzstan men Ózbekstannan jumysshylar bar. Al biz, óndiristik óńirde materıaldy-tehnıkalyq bazamyz bola tura, osyndaı kásiporyndardy kadrmen qamtamasyz ete almaı otyrmyz».
Agrarly-tehnıkalyq kolledjderdiń basshylary túıtkildi máselelerdiń bar ekenin jasyrmady. Onyń biri - jastardyń kóbisi mamandyqqa nazar aýdarmaı, kolledjderge tek dıplom úshin keletini. Sonymen qatar, oqýyn aıaqtaǵannan keıin kóptegen túlekter egin men shabyndyq naýqanynda ǵana tabys tabýǵa barady. - Sonda biz kolledjderdi maýsymdyq jumyskerlerdi daıyndaý úshin ustap otyrmyz ba? - dedi oblys ákimi. «Tórt jyl oqytyp, bir maman daıarlaýǵa 4 mıllıon teńgeden astam qarjy jumsap 2 aılyq jumyskerdi shyǵaramyz ba? Bul ádis durys emes. Agrarly-tehnıkalyq kolledjderdiń máseleleri Bilim jáne ǵylym mınıstrligimen kelisilgen «biriktirý» jolymen sheshiledi». Krasnoarmeıka agrarly-tehnıkalyq kolledji «Pavlodar oblysynyń agrarly ınnovatsııalyq kolledji» bolyp qaıta qurylyp, ózge KjTBB shaǵyn uıymdaryn oǵan qosý josparlanýda. Usynylǵan qurylymda barlyq teorııalyq oqytýlar Krasnoarmeıkada ótkizilip, ózge aýdandardaǵy kolledjder tájirıbeden ótý orny retinde qoldanylady. Bolat Baqaýov barlyǵyn tııanaqty qarastyryp, jaqyn arada biriktirý jumysyna kirisýge tapsyrma berdi. 
