Pavlodar oblysy Ózbekstanǵa 11 myń tonna kartop eksporttady
PAVLODAR. QazAqparat - 2018 jyly Pavlodar oblysynda aýyl sharýashylyq ónimderi boıynsha eskport kólemi artqan. Bul týraly aýyl sharýashylyǵy basqarmasy basshysynyń mindetin atqarýshy Marlen Ospanov málim etti, dep habarlaıdy pavlodarnews.kz.
«Óńirimizde byltyr 146 myń tonna ónim eksporttalǵan. Bıyl eksporttyń 33 paıyzyn - bıdaı, 20 paıyzyn - kartop aldy. Jyl basynan beri Qytaıǵa 9 myń tonadan astam maıly dánder jiberilse, «Abaı» sharýa qojalyǵy bir ret Birikken Arab Ámirlikterine qoı etin jiberdi. Eksporttyń kóbi Ortalyq Azııa elderine asyrylady. Atap aıtqanda, Qyrǵyzstan, Ózbekstan elderimen qatar Reseı, Aýǵanstan, Grýzııa memleketteri bar»,- dedi Marlen Ospanov.
Oblystyq aýyl sharýashylyǵy basqarmasy aýyl sharýashylyǵy ónimderin daıyndaý jáne qaıta óńdeý bóliminiń bas mamany Aıdana Beısekeevanyń aıtýynsha, pavlodarlyq kartop Reseıde joǵary baǵalanady.
«Bıyl 509 tonnadan astam kartop jınaldy. Ónimdilik gektaryna 292 tonnany qurady. Reseıde bizdiń kartopqa degen suranys joǵary. Jyl basynan beri 1,5 tonna kartop jiberildi. Jyl sońyna deıin taǵy 10 myń tonna jiberý josparlanýda», -deıdi Aıdana Beısekeeva.
Jalpy kartopty Reseı kúz aılarynd, al aqpan-naýryz aılarynda Ózbekstan alady. Osy jyly Ózbekstanǵa 11 myń tonna eksporttaldy. Sonymen qatar, baqsha daqyldarynyń 80 túrin ósiretin «Qaırat» sharýa qojalyǵy Reseıge 188 tonna qarbyz jóneltken. Byltyrǵy jylmen salystyrǵanda eksport 10-15 paıyzǵa joǵarylap otyr.
