Pavlodar oblysy: «Kókjal orman sharýashylyǵyndaǵy órt qasaqana qoıylǵan» - Besqaraǵaı fılıaly dırektory m.a. R. Nyǵmanov
PAVLODAR. QazAqparat - Pavlodar oblysy Lebıaji aýdanyna qarasty «Ertis ormany» memlekettik orman tabıǵı rezervatynyń Besqaraǵaı fılıalynda 83,4 gektar jer qyzyl jalynnyń astynda qaldy.
Bul týraly «Ertis ormany» rezervaty Besqaraǵaı fılıaly dırektorynyń mindetin atqarýshy Rızat Nyǵmanov málim etti, dep habarlaıdy Ravlodarnews.kz.
«Ormanshylar órtti 16.00-de anyqtap, eki saǵattan keıin tolyǵymen sóndirgen. Kókjal orman sharýashylyǵynyń jaıylymynda, ıaǵnı, 92, 95, 96 oramynda oryn alǵan tilsiz jaýdy aýyzdyqtaýǵa eki órt sóndirý tehnıkasy men jeke quramnan 12 adam jumyldyryldy. Aldyn ala boljam boıynsha órt qasaqana qoıylǵan. Alaıda bul joramal tekserý amaldarynyń qorytyndysynan keıin belgili bolady», - dedi R. Nyǵmanov. Besqaraǵaı fılıalyna alty orman sharýashylyǵy kiredi. Bul - Maıqaraǵaı, Taıǵabar, Báıimbet, Besqaraǵaı, Kókterek, Maraldy jáne Kókjal ormanshylyqtary. Eń iri aýmaqty alyp jatqan Kókjal ormanshylyǵynyń kólemi - 24 572 gektar jer. Eske sala keteıik, buǵan deıin osy aptada Maı aýdanyna qarasty bos jatqan jerdiń 120 gektary qyzyl jalynǵa oranǵan.
