Pavlodar oblysy Qazaqstandaǵy kómirdiń 60 paıyzyn óndiredi
PAVLODAR. QazAqparat - Ertis óńirinde jyl basynan beri tas kómir jáne lıgnıt 73,4 mlrd teńge somasynda óndirildi, dep habarlaıdy pavlodarnews.kz.
Oblystyq statıstıka departamentiniń málimdeýinshe, 2019 jylǵy qańtar-shildedegi tas kómir jáne lıgnıt 73,4 mlrd teńge somasynda óndirildi. Ol jalpy oblys ónerkásibi kóleminde 6,5 paıyzdy quraıdy.
- Kómir óndirý boıynsha Pavlodar oblysy respýblıkada birinshi orynda (38 mln tonna). – dedi departamentte. – Memleketimizdiń jalpy kómir óndirisindegi (62,4 mln. tonna) Pavlodar oblysynyń úles salmaǵy 60,8 paıyz.
Kelesi kezekte Qaraǵandy oblysy – 32,9 paıyz jáne Shyǵys Qazaqstan oblysy – 6,1 paıyz. Bıylǵy qańtar-shildede kómir jáne lıgnıt óndirisine salynǵan ınvestıtsııa 12,9 mlrd teńgeni qurady. Bul - byltyrǵy sáıkes kezeń deńgeıinen 2,1 ese tómen kórsetkish.
Aıta keteıik, 2019 jylǵy qańtar-maýsymda kómir ónerkásibi jumysshylarynyń oblystyq ortasha aılyq eńbekaqysy 216005 teńgeni qurady, bul - respýblıkalyq kórsetkishten 19,9 paıyzǵa (269604 teńge) tómen jáne oblystyń ónerkásibi eńbekaqysynan 10,6 paıyz joǵary.
