Pavlodar oblysy Ertis aýdanynda latyn grafıkasyna úıretý ortalyǵy ashyldy

ERTІS. QazAqparat - Pavlodar oblysynyń Ertis aýdanynyń ortalyǵynda «Bolashaqqa baǵdar: rýhanı jańǵyrý» baǵdarlamasy aıasynda latyn grafıkasyn úıretetin Tildes ortalyǵy iske qosyldy, dep habarlaıdy pavlodarnews.kz.

Aýdandyq Mádenıet jáne tilderdi damytý bóliminiń bas mamany Tolǵanaı Rahmetovanyń aıtýynsha, bul óńirdegi latyn álipbıine úıretetin alǵashqy ortalyq.

«Mundaǵy basty maqsat - ádistemelik materıaldardy bir jerge jınaqtap, latyn grafıkasyna qatysty jumysty birizdi júrgizý, - deıdi Tolǵanaı Rahmetova.

Onyń sózinshe, qazirgi tańda memlekettik mekemeler men kásiporyndar, jeke tulǵalar latyn grafıkasyna qujattaryn kóshirýde qınalady. Sondyqtan osyndaı jaǵdaıda olarǵa bizdiń ortalyqta kómek kórsetedi. 18 jastan bastap keletin qatysýshylardyń jasyna shekteý qoıylmaıdy jáne sońǵy maquldanǵan nusqasy boıynsha tegin oqytylady.

Jergilikti bıýdjetten bólingen 600 myń teńgege jýyq qarajatqa aýdandyq kitaphananyń janyndaǵy kabınetke jóndeý júrgizilip, qajetti quraldarmen jabdyqtalǵan. Bıylǵy jyldyń mamyr aıynda Nur-Sultan qalasynda arnaıy kýrsta biliktiligin arttyryp kelgen qazaq tili mamany Aısulý Espaeva sabaq beredi. Bir topta 20-30 adamnan aptasynan eki retten qatysady.

«Aldaǵy ýaqytta jaz mezgilinde aýyldyq aımaqtardy aralap shyǵýdy kózdep otyrmyz. Turǵyndardy latyn álipbıin qoldanýǵa daıyndaý maqsatynda stýdentterdiń arasynda «Latynsha úıreneıik» aktsııasy men «Jańa emledegi jańalyqtar» aıdary boıynsha jumys isteımiz», - deıdi bas maman.

Aıta keterligi, 16 myńnan astam turǵyny bar aýdannyń úsh aýylynda kireberistegi stellanyń jazýy men batyrlar alańynyń mekenjaıy latyn áripterine aýystyrylǵan.