Pavlodar oblysy elordada Qanysh Sátbaevtyń eskertkishin ornatady
Bul týraly onlaın ótken baspasóz máslıhatynda Pavlodar oblysynyń mádenıet, tilderdi damytý jáne arhıv isi basqarmasy basshysynyń mindetin atqarýshy Sáýle Ospanova málim etti.
- Merekelik sharalar barysynda 3 shildede Astana kúni qarsańynda Nur-Sultan qalasynda Qanysh Sátbaev eskertkishiniń ashylýy ótedi. Eskertkish Pavlodar oblysynyń ákimdigi atynan Nur-Sultan qalasynyń ákimdigine syıǵa tartylady. Onyń avtory – belgili músinshi, birqatar úlken eskertkishterdiń avtory Asqar Nartov. Eskertkish elordadaǵy Qanysh Sátbaev pen Qajymuqan Muńaıtpasov kósheleriniń qıylysyndaǵy «Qazaqstan» sport kesheniniń aldynda ornatylady, - dedi Sáýle Ospanova.
Eskertkish qoladan quıylǵan, bıiktigi 5,25 m, salmaǵy 4,9 tonna. Tuǵyr tasy granıtten jasalǵan, bıiktigi – 5,8 m, salmaǵy – 3,6 tonna.
Sondaı-aq Astana kúnine Pavlodar oblysy boıynsha 270-ten astam is-shara ótkizý josparlandy. Onyń 30-dan astamy oblystyq mádenıet kásiporyndary men mekemelerinde ótkiziletin bolady.
Onyń ishinde merekelik kontsertter, aktsııalar, vıktorınalar, kórmeler, kvestter, chellendjder, dárister, dóńgelek ústelder, ádebı jáne mýzykalyq keshter jáne basqa da sharalar bar.
- 6-30 shilde aralyǵynda oblystyq kórkemsýret mýzeıinde «Táýelsizdik kepili. Oqıǵalar men ómir hronıkasy» fotokórmesi jumys jasaıdy. Shilde aıy boıy Pavlodar qalasynyń ortalyq kitaphanasynda «Táýelsizdik rýhymen» kitap kórmesi uıymdastyrylady. El Táýelsizdiginiń 30 jyldyǵy sheńberinde «Shańyraq» ortalyǵy 21 maýsymnan bastap 3 shildege deıin «Eńsesi bıik Elorda» balalar men jasóspirimder arasynda án jáne kórkemsóz oqý sheberleriniń baıqaýyn ótkizýde, - dedi Sáýle Ospanova.
Al, 6 shildede oblys ortalyǵyndaǵy barlyq mýzykalyq mektepter men mýzykalyq ujymdar óz alańdarynda, syrtta kontsert uıymdastyrady.