Pavlodar oblysy Astananyń 20 jyldyǵyna velojol syıǵa tartady
PAVLODAR. QazAqparat - Pavlodar oblysy Astananyń 20 jyldyq mereıtoıyna oraı uzyndyǵy 11 shaqyrym velojol syıǵa tartady. Bul týraly búgin oblys ákimdiginde ótken keńeıtilgen otyrysta ishki saıasat basqarmasy basshysynyń mindetin atqarýshy Svetlana Gladysheva aıtty, dep habarlaıdy pavlodarnews.kz.
«Búgingi tańda óńirde «Rýhanı jańǵyrý» baǵdarlamasyn júzege asyrý, Astananyń 20 jyldyǵy men Pavlodar oblysynyń 80 jyldyǵy aıasynda 700-den astam shara josparlanǵan», - dedi Svetlana Gladysheva. - Qalalar men aýdandarda 10-naýryzdan bastap Astananyń 20 jyldyǵyn merekeleýge arnalǵan saltanatty sharalar bastaý aldy. Elordanyń 20 jyldyq mereıtoıyna oraı salynatyn velojoldyń qurylysy 10 naýryzda bastalyp, 2018 jyldyń maýsym aıynda aıaqtalady. Budan basqa, 2017 jyldyń 10 jeltoqsany - 2018 jyldyń 16 shildesi aralyǵynda 70-ten astam áleýmettik-óndiristik jobany iske qosý josparlanyp otyr. Onyń ishinde «Prommashkomplekt» sııaqty iri jobalar bar».
Oblystyq sáýlet jáne qala qurylysy basqarmasynyń basshysy Nurlan Qaqambetovtyń aıtýynsha, 2018 jyldyń 8 aqpanynan bastap velojolǵa qatysty Astana qalasynyń ákimdigimen tıisti qujattar daıyndalǵan. Merdiger bordıýr tastary men ınertti materıaldardy júz paıyz daıyndap qoıǵan. Búgingi tańda oryndyqtar satyp alynýda. Asfalt tósemesi bir úlgide bolýy úshin alty oblys bir materıaldy qoldanýy tıis. Osyǵan baılanysty birneshe zaýytpen kelissóz júrgizilýde. Alty óńirdiń ishinde Pavlodar oblysy aldyńǵy qatarda keledi. Qarjylandyrýǵa baılanysty eshbir másele joq. Aımaq basshysy Astana qalasynyń ortalyǵynda velojol salý Pavlodar oblysy úshin zor mártebe ekenin atap ótti. Sonymen qatar ol merekege deıin belarýs tramvaılaryn jetkizýdi tapsyrdy.
«1 shildege deıin vagondar jetkizilýi kerek», - dedi Bolat Baqaýov. - Qajet bolǵan jaǵdaıda elshilikpen baılanysqa shyǵyńyzdar. Biz olarmen kelisimshartty uzartqan joqpyz. Qansha qajet bolsa da kútýge daıynbyz. Degenmen olar aıyppul sanktsııasy júrip jatqanyn oılaýy kerek».
