Pavlodar oblystyq bilim basqarmasy turǵyndardan baraban tapsyrýdy surady
ASTANA. QazAqparat - QR Bilim jáne ǵylym mınıstrliginiń bastamasymen 1-maýsym kúni elimizdiń barlyq óńirinde balalar jáne jastar mýzykalyq ansamblderiniń sherýi ótedi.
Osyǵan oraı oblystyq bilim berý basqarmasy oblys turǵyndaryn baraban jınaýǵa kómektesýdi surady, dep habarlaıdy pavlodarnews.kz.
Oblystyq bilim berý basqarmasy basshysynyń orynbasary Ernur Dáýenovtiń aıtýynsha, turǵyndardyń barabandardy Pavlodar qalasyndaǵy M.Kataev atyndaǵy oqýshylar saraıyna ákelip tapsyrýyna bolady. Al, sherý 1-maýsym kúni ortalyq alańda ótedi.
- Bizdiń ótinishimizge qulaq asyp, kómek kórsetem degen turǵyndar bolsa, barabandardy M.Kataev atyndaǵy oblystyq oqýshylar saraıyna ákelip berýlerińizge bolady. Biz barabannyń qandaı túri bolsa da qýana qabyldaımyz. Máselen, eki jaqtysyn nemese birjaqtysyn, eskisin de, jańasyn da qabyldaı beremiz. Turǵyndardyń bul syılyǵy bizdiń talantty oqýshylarymyz úshin mańyzdy. Olar sherýde osy aspaptarda oınaıtyn bolady, - deıdi Ernur Dáýenov.
Atalmysh sherýge 45 balalar jáne jastar mýzykalyq ansambli, óńirdegi kóptegen oqý oryn ujymdarynan 4500 oqýshy qatysady. Merekelik sherýde úrmeli aspaptar orkestri, qazaq jáne orys halqynyń ishekti aspaptar ansambli, sondaı-aq, bı jáne hor ujymdary óner kórsetedi.
