Pavlodar oblysynyń sheneýnikteri jumys ýaqytynda shetelde júrgen
PAVLODAR. KAZINFORM - Ertis-Baıan óńirinde birqatar memlekettik qyzmetshi jumys ýaqytynda shekara asyp, Reseıge shyǵyp ketkeni belgili boldy.
Alaıda sheneýnikterdiń eńbek tabelinde jumysta bolǵan dep kórsetilip, jalaqy alǵan.
Eńbek tabelin jalǵan aqparatpen toltyrǵan memlekettik qyzmetshilerdiń máselesi ádep keńesiniń kezekti otyrysynda qaraldy.
Jumys ýaqytynda el ishinde bolmaǵan sheneýnikterdiń biri - Ekibastuz qalalyq turǵyn úı ınspektsııasy basshysynyń orynbasary. Ol 2024 jyldyń qarasha aıynda Reseı Federatsııasy baǵytynda shekarany kesip ótken. Jumystan otbasy jaǵdaıyma baılanysty dep suranǵan. Biraq eńbek tabeli basqasha toltyrylyp, el ishinde bolmaǵan kúnderi úshin de eńbekaqy jazylǵan.
Al ótken jyldyń jeltoqsan aıynda Jelezın aýdany Aqtaý aýyldyq okrýgi apparatynyń bas mamany da jumys ýaqytynda memlekettik shekaradan shyqqan. Ol basshysynan densaýlyǵyna baılanysty aýdan ortalyǵyna baramyn dep suranǵan eken. Bul jaǵdaıda da qyzmetkerdiń jumysta bolǵandyǵy kórsetilgen.
Ádep jónindegi keńes barysynda mekeme basshylary qolastyndaǵy qyzmetkerlerdiń jónsiz qylyǵy úshin keshirim surap, baqylaý kezinde jibergen kemshilikterin moıyndady. Keńes músheleri Ekibastuz qalasynyń ákimine jáne Jelezın aýdanynyń ákimine sheneýnikterge qyzmetke tolyq sáıkes emestigi týraly eskertý berý kerektigin usyndy.
Eske sala keteıik, Pavlodarda 40-tan astam memlekettik qyzmetshi jumys ýaqytynan tys eńbekke tartylyp kelgen.