Pavlodar oblysynyń prokýratýrasy 6,5 mlrd teńgeniń múlkin memleketke qaıtardy

ASTANA. KAZINFORM – Ótken jyly prokýratýra ókilderi 32 mlrd teńge mólsherindegi zańsyz memlekettik satyp alýlardy toqtatty, dep habarlaıdy Pavlodar oblystyq prokýratýrasynyń baspasóz qyzmeti.

Bul týraly prokýratýra 2025 jylǵy jylǵy qadaǵalaý qyzmetiniń qorytyndysyna sáıkes málim etti.

Qorytyndy qujattaǵy málimetterge qaraǵanda, prokýratýra memlekettiń materıaldyq múddelerin qorǵaý maqsatynda bıýdjettiń 24,1 mlrd teńgesiniń negizsiz jumsalýynyń aldyn alǵan. Sondaı-aq 3 mlrd teńge kóleminde zalaldy óndirip, 6,5 mlrd teńge somasyndaǵy múlikti qaıtarǵan, sonymen qatar 1 mlrd teńge aıyppul óndirip alǵan.

-Bıýdjet qarajatyn jumsaý kezinde anyqtalǵan zańsyz áreketter boıynsha sotqa deıingi tergep-tekserýler bastaldy. Mysaly, Aqsý qalasy qurylys bóliminiń burynǵy basshysy áleýmettik osal toptaǵy azamattar úshin aıaqtalmaǵan páterlerdi satyp alǵany úshin 2 jylǵa bas bostandyǵynan aıyryldy.

Onyń aldyndaǵy basshyǵa jáne merdigerge qatysty kóppáterli turǵyn úı qurylysy kezinde oryndalmaǵan jumystar úshin 451 mln teńge tóleý faktileri boıynsha tergeý júrip jatyr.

Tsıfrlandyrý salasynda, onyń ishinde aýyldyq jerlerdi ınternetpen qamtamasyz etý barysynda 150 mln teńge kóleminde qarjy jymqyrý faktisi anyqtaldy,-delingen habarlamada.

Kúdiktiler qamaýda, oblys prokýratýrasynyń sotqa deıingi tergep-tekserý basqarmasy tergeý júrgizip jatyr. Jalpy alǵanda, 160 adam túrli áreketter boıynsha jaýapqa tartyldy. 11 adamǵa qatysty aıyptaý úkimderi shyǵaryldy. Memlekettiń ekonomıkalyq múddelerin qorǵaý baǵytyndaǵy qadaǵalaý jumystary jalǵasa bermek.

Osyǵan deıin Aqmola oblysynda prokýratýranyń yqpalymen múgedektigi bar adamdardy jumyspen qamtý kvotasy ulǵaıǵany týraly jazdyq.