Pavlodar oblysynda 223 kópqabatty úı ystyq sýsyz otyr
PAVLODAR. KAZINFORM — Ystyq sýdan ýaqytsha ajyratylǵan kópqabatty úılerdiń eń kóbi oblys ortalyǵynda. Munda 117 úıdiń turǵyndary jóndeý jumystarynyń tezirek aıaqtalýyn asyǵa kútip otyr.
Óńirlik energetıka jáne turǵyn úı-kommýnaldyq sharýashylyq basqarmasynyń málimetinshe, gıdravlıkalyq synaqtar júrgizilgennen keıin barlyǵy 592 zaqymdaný anyqtalǵan. Qazir onyń 471-i joıylǵan.
— Máselen Pavlodar qalasynda 280 zaqymdaný anyqtaldy, onyń ishinde magıstraldyq jylý jelilerinde — 44 jáne kvartalishilik jelilerde — 236. Barlyq aqaý joıyldy. 1324 kópqabatty úıdiń ishinen 1207 kóppáterli turǵyn úı nemese 91%-y ystyq sýǵa qosyldy. Jylý jelilerin kúrdeli jóndeý jáne qaıta qurý jumystarynyń júrgizilýine baılanysty 117 kópqabatty úıde ázirshe ystyq sý joq, — dep habarlady basqarmadan.
Ekibastuzda gıdravlıkalyq synaqtar nátıjesinde anyqtalǵan zaqymdanýlardy joıý jumystary áli de jalǵasyp jatyr. 289 ýchaskeniń 168-i jóndeldi. Ózge zaqymdanýlar jeke sektorda ornalasqan jáne kópqabatty úılerge ystyq sý berýge áser etpeıdi. Turǵyn úılerdiń 78-inde ystyq sýdyń bolmaýy JM-5, JM-10, JM-11 jáne JM-16 jylý magıstraldary jelilerin qaıta qurý jumystarymen baılanysty bolyp otyr.
Al Aqsýda 23 zaqymdaný anyqtalyp, tolyq joıylǵan. Biraq bul qalada da ystyq sýsyz otyrǵan úıler bar. Onyń ishinde 5 úı jylý jelilerin qaıta qurý jáne kúrdeli jóndeý jumystaryna baılanysty, al 23 kópqabatty úı káriz kollektorynyń tartylýyna oraı sýsyz qalyp otyr.
Shenenikterdiń málimetinshe, 2026 jyly Pavlodar oblysynda shamamen 49 shaqyrym jelini jóndeý josparlanǵan.
Bıylǵy jyly josparǵa sáıkes Qazaqstanda 377 shaqyrym jylý jelisin rekonstrýktsııalaý jáne kúrdeli jóndeý kózdelgen.
