Pavlodar oblysynyń halqy jerasty dúmpýlerin sezindi
PAVLODAR. KAZINFORM — Jer silkinisi búgin Astana ýaqytymen saǵat 11.28-de bolǵan. Baıanaýyl aýdanynda 2 balldyq dúmpýler tirkelgen.
QR Tótenshe jaǵdaılar mınıstrliginiń málimetinshe, bul oqıǵany «Seısmologııalyq baıqaý jáne zertteýler ulttyq ǵylymı ortalyǵy» JShS seısmıkalyq stansalar jelisi tirkegen. Jerasty terbelisteriniń epıtsentri Pavlodar oblysynyń aýmaǵynda, Baıanaýyl aýdanynda (Almatydan soltústik-batysqa qaraı 855 shaqyrym jerde) ornalasqan.
— Epıtsentrdiń koordınattary: 50.47º s. e. 76.47º sh. b. Tereńdigi — 30 km. Eseptelgen qarqyndylyǵy: Baıanaýyl aýdany, Baıanaýyl aýylynda 2 ball qurady. Іs-qımyldardy úılestirý jáne jaǵdaıǵa monıtorıng júrgizý úshin Pavlodar oblysy tótenshe jaǵdaılar departamenti bazasynda jedel shtab quryldy, — dep habarlady QR Tótenshe jaǵdaılar mınıstrliginen.
Ázirshe jer asty dúmpýi saldarynan ǵımarattar men nysandardyń qıraýy men zardap shekkender týraly aqparat túspegen. Tirshilikti qamtamasyz etý nysandary shtattyq rejımde jumys istep tur. Sonymen qatar, 87182 20-11-12 nómiri boıynsha jedel jeli ashyldy.
Al Pavlodar oblysynyń ákimdigi jergilikti atqarýshy organdar jaýapty qyzmetterdiń jumysyn úılestirip jatqanyn habarlady. Aldyn ala málimet boıynsha, jaǵdaı turaqty, halyqqa qaýip joq. Qala turǵyndarynan medıtsınalyq kómekke júginý faktileri men zaqymdanýlar tirkelmegen.
Eske sala keteıik, buǵan deıin seısmologtar Kaspıı teńiziniń akvatorııasynda magnıtýdasy 4,2 bolatyn jer silkinisi bolǵanyn jazǵanbyz.
