Pavlodar oblysynyń halqy táýligine qansha nan tutynady
PAVLODAR. KAZINFORM — Jergilikti tutynýshylardyń formalanǵan nanǵa aı saıynǵy qajettiligi — 1 740,7 tonna. Óńirde 70 naýbaıhana men 31 kondıterlik tseh jumys isteıdi.
Oblystyq aýyl sharýashylyǵy basqarmasynyń málimetinshe, barlyq túrdegi nan túrleri óndirisiniń aı saıynǵy kólemi — 3 766 tonna. Al saýda nysandary arqyly kún saıyn orta eseppen 5 myń orama nan satylady. Turǵyndar arasynda formalanǵan nan túri erekshe suranysqa ıe.
— Formalanǵan nanǵa aı saıynǵy qajettilik — 1 740,7 tonna. Bul rette onyń táýliktik qajettiligi shamamen 3 myń bólke. Ótken jyldyń sáıkes kezeńimen salystyrǵanda óńirde nan-toqash ónimderin tutyný kólemi 5 paıyzǵa artqan. Muny oblys halqy sanynyń ósýimen baılanystyrýǵa bolar. Formalanǵan nanǵa degen kúndelikti suranysty qamtamasyz etý úshin shamamen 60 tonna bıdaı qajet, — dep habarlady Kazinform tilshisine aýyl sharýashylyǵy basqarmasynan.
Mamandar nan ónimderin óndirýde joǵary jáne birinshi sortty un paıdalanylatynyn atap ótti. Naýbaıhanalar men kondıterlik tsehtar negizinen jergilikti óndiristiń unymen qamtamasyz etilgen. Qalalar men aýdardarda naýbaıhana tapshylyǵy baıqalmaıdy.
Aýyl sharýashylyǵy basqarmasynyń dereginshe, bıyl oblysta dándi daqyldardyń jalpy túsimi 724,6 myń tonnany quraǵan. Ortasha ónimdilik gektaryna 9,2 tsentnerden aınaldy. Onyń ishinde bıdaıdyń jalpy túsimi 495,7 myń tonnany, al ortasha ónimdiligi gektaryna 8,9 tsentnerdi quraǵan.
Eske sala keteıik, Qazaqstannyń óńdelgen aýyl sharýashylyǵy ónimderi eksporty 3 mlrd dollardan asty.
