Pavlodar oblysynyń energetıkalyq nysandary bir jylda 30 mln tonna kómir tutynady
PAVLODAR. KAZINFORM - Ertis-Baıan óńiriniń energetıkalyq keshenine 7 iri stansa kiredi. Kásiporyndardyń jalpy qýattylyǵy - 8002 MVt. Oblys elimizde óndiriletin elektr qýatynyń 42 paıyzyn berip otyr.
Pavlodar oblysyndaǵy energetıkalyq keshender jylyna shamamen 30 mln tonna kómir jáne 65 myń tonna mazýt tutynady. Oblystyń energııa kózderi úshin kómirdiń negizgi jetkizýshileri - «Bogatyr Kómir» jáne «Shyǵys» kenishteri. Al Pavlodar munaı-hımııa zaýyty stansalarǵa mazýt jetkizedi.
- Kómir tutyný boıynsha alyp qaraıtyn bolsaq, «Ekibastuz GRES-1 stantsııasy» JShS bir jylda -12,5 mln tonna kómir men 9 myń tonna mazýt, «Ekibastuz GRES-2 stantsııasy» AQ - 4,3 mln tonna kómir men 5,7 myń tonna mazýt, «Eýroazııalyq energetıkalyq korporatsııasy» AQ - 7,2 mln tonna kómir men 8 myń tonna mazýt satyp alady. Ózge bóligi «Qazaqstan alıýmınııi» AQ JEO, «Pavlodarenergo» AQ JEO-2 jáne JEO-3 stansalaryna, Ekibastuz jylý ortalyǵy «Energy Solutions» JShS-ne tıesili, - dep habarlady Pavlodar oblysynyń energetıka jáne turǵyn úı-kommýnaldyq sharýashylyǵy basqarmasynan.
Óńirde bıyl kómir baǵasynyń ósýine jol berilmeıdi delinip otyr. Ol úshin atalǵan basqarma kómir óndirýshi kásiporyndarmen «Pavlodar oblysyndaǵy áleýmettik-ekonomıkalyq jaǵdaıdy turaqtandyrý boıynsha ózara yntymaqtastyq týraly» memorandým jasaǵan. Qazirgi ýaqytta bir tonna tas kómirdiń baǵasy - 4,2 myń teńgeni jáne qońyr kómirdiń bosatylý baǵasy - 8,3 myń teńgeni qurap otyr.
Eske sala keteıik, Pavlodar qalasyna 9 qyrkúıekten jylý berile bastady.
