Pavlodar oblysynyń dendroaımaqtarynda tórt jylda 360 myńnan astam aǵash egilgen
PAVLODAR. KAZINFORM — Bıyl jalpy somasy 750 mln teńgege 66,3 myń dana japyraqty jáne qylqan japyraqty kóshetter otyrǵyzý josparlanǵan.
«Pavlodar oblysynyń eldi mekenderin kógaldandyrý men jasyl aımaqtardy qurýdyń 2021-2025 jyldarǵa arnalǵan óńirlik josparynyń» nátıjelerine óńirlik energetıka jáne turǵyn úı-kommýnaldyq sharýashylyq basqarmasy monıtorıng júrgizip jatyr.
— Óńirdiń 3 qalasynda dendrojospar ázirlengen. Túgendeý nátıjesinde Pavlodar, Ekibastuz jáne Aqsý qalalarynda ártúrli jyldaǵy 360 myńnan astam aǵash bar ekeni anyqtaldy. Dendrojospar qurylys salý aımaǵyn eskerip, kógaldardyń, alańdardyń, joldardyń, sý aıdyndarynyń ashyq ýchaskelerimen ushtastyra otyryp, qoldanystaǵy jáne otyrǵyzýǵa jobalanatyn aǵash-buta jasyl ekpeleriniń sandyq jáne túrlik quramyna oraı jasyl ekpelerdi ornalastyrýdy kózdeıdi. Kógaldandyrýdyń óńirlik josparyn oryndaý sheńberinde 2021-2024 jyldary Pavlodar oblysynda 357,7 myń dana túrli tuqymdy aǵash otyrǵyzylǵan. Jyl saıyn jasyl jelekterdi otyrǵyzý jáne sanıtarlyq-qorǵaý aımaqtaryn qamtamasyz etý boıynsha qala quraýshy kásiporyndar belsendi jumys júrgizýde, -deıdi energetıka jáne turǵyn úı-kommýnaldyq sharýashylyq basqarmasynyń bas mamany Álisher Temirtas.
Jospar boıynsha, bıyl aımaqta 750 mln teńgege 66,3 myń dana japyraqty jáne qylqan japyraqty kóshet otyrǵyzý kózdelgen. Sonymen qatar, qalalarda dendrologııalyq jospar aıasynda jasyl jelekterdi qaıta jańartý jumystary qarastyrylǵan. Eldi mekenderdi kógaldandyrýdy baqylaý jasalǵan sharttarǵa sáıkes júrgiziledi. Onyń sheńberinde merdiger uıym jasyl jelekterdiń bir jyl merzimge deıin ómirsheńdigin saqtaý jáne kepildikti qamtamasyz etý jónindegi mindettemeni ózine alady. Sondaı-aq, ekolog mamandar merdiger uıymdarmen birlesip jyl saıyn kóshetterdiń jetilýine monıtorıng júrgizedi. Onyń qorytyndysy boıynsha usynystar beriledi. Qala ákimdigi ekologtarmen birlesip kóshetterdiń kóktep ketýine kóktemgi tekserýdi josparlap otyr. Merdiger uıym ekken aǵashtar qýrap qalǵan jaǵdaıda ornyna jańa kóshetter otyrǵyzylatyn bolady.
Buǵan deıin Pavlodarda Ýsolka eko-parkiniń qurylysy bastalatyny týraly jazǵan edik