Pavlodar oblysynyń Atyǵaı aýylynda KAZ Minerals kompanııasynyń qoldaýymen jańa mektep salyndy
PAVLODAR. KAZINFORM — Atyǵaıdaǵy eski mektep 36 jyl buryn ashylǵan. Osy ýaqyt aralyǵynda ol burynǵy balabaqsha ǵımaratynda jumys istep keldi. Mekteptiń tar bolýy sebepti sabaqtar eki aýysymmen júrgizildi, dep habarlaıdy Kazinform agenttiginiń tilshisi.
Al bıyl balalar oqý jylyn jańa mektepte bastaıdy. Ǵımarat 120 orynǵa eseptelgen, aýmaǵy 1,5 myń sharshy metrden asady. Іshi jaryq, ári keń. Munda fızıka, hımııa, bıologııa, STEM-zerthana jasaqtalyp, sport jáne shyǵarmashylyqpen aınalysatyn oryndar paıda boldy.
— Eski mektep yńǵaısyz edi. Buryn balabaqsha bolǵandyqtan onda bizge kabınet jetispeıtin. Al qazir zerthana, oqý bólmeleri, úlken ashana men keń sportzalymyz bar. Kabınetterde kompıýter men ınteraktıvti taqtalar ornatylǵan, — deıdi mektep dırektorynyń orynbasary Quralaı Qaspaqova.
Hımııa jáne bıologııa pániniń muǵalimi retinde Quralaı úshin oqýshylarda praktıkalyq dáristerge qajettiniń bári bolýy óte mańyzdy.
— Eski mektepte biz tolyqqandy zerthanalyq jumystar júrgize almadyq. Negizinen vırtýaldy zerthanalardy qoldanyp, tájirıbe jumysyn ekranda kórsetip keldik. Endi balalar ózderi tájirıbe jasaı alady. Ol úshin bizde quraldar men reaktıvter bar, — deıdi ustaz.
Oń ózgeristerge oqýshylar da laıyqty baǵasyn berdi. Besinshi synyptaǵy Irına Şetınınaǵa jańa mekteptiń úlken sport zaly unapty.
— Mektep óte ádemi, munda oryn kóp, — deıdi oqýshy qyz.
Jańa oqý jylynda mektepte kúres, ústel tennısi, horeografııa, shahmat, dombyra men vokal sektsııalary ashylady.
— Bizdiń balalarymyz meıli aýyl bolsyn, meıli qala bolsyn, qaı jerde turatyndaryna qaramastan sapaly bilim alýǵa tıis. Biz Atyǵaı aýylynyń turǵyndaryna bergen ýádeni oryndaǵanymyzǵa rızamyz, — dedi mekteptiń ashylý saltanatynda aımaq basshysy Asaıyn Baıhanov.
Ol jańa mektep qurylysyna 1,48 mlrd teńge bólgen joba demeýshisi — KAZ Minerals Bozshakol kompanııasyna erekshe alǵysyn bildirdi.
— KAZ Minerals úshin ózi jumys isteıtin óńirdegi jobalarǵa qoldaý kórsetý óte mańyzdy. Biz óz ınvestıtsııalarymyzdyń shynymen de asa mańyzdy salalarǵa — eń aldymen bilim men densaýlyq saqtaý salasyna baǵyttalǵanyn qalaımyz, — dep atap ótti KAZ Minerals Bozshakol dırektory Djonatan Rao.
Onyń sózinshe, kompanııa áleýmettik jobalardy aımaqtyń qajettiligine saı júzege asyrady. Jýyrda KAZ Minerals qoldaýymen Ekibastuzdaǵy temirjol vokzalynda jóndeý jumysy júrgizildi. Al 1 qyrkúıekte 127 bala Atyǵaıdaǵy jańa mektep tabaldyryǵyn attaıdy.
