Pavlodar oblysynyń Aqtoǵaı aýdanyna jańa ákim taǵaıyndaldy
PAVLODAR. KAZINFORM – Pavlodar oblysynyń ákimi Asaıyn Baıhanov Aqtoǵaı aýdanynyń aktıvine jańa ákimdi tanystyrdy.Bul týraly oblys ákiminiń baspasóz qyzmeti habarlady.
Qazaqstan Prezıdenti Ákimshiliginiń kelisimimen, aýdandyq máslıhat depýtattarynyń kelisimi jáne óńir basshysynyń ókimimen Aqtoǵaı aýdanynyń ákimi laýazymyna Ernur Áıtkenov taǵaıyndaldy.
Ernur Nurmuhanuly 1965 jyly týǵan. Maı aýdanynyń týmasy.
Joǵary bilimdi, memlekettik qyzmette 20 jyldan astam eńbek ótili bar. Ár jyldary Maı, Baıanaýyl, Aqqýly jáne Tereńkól aýdandaryn basqardy. Sońǵy jyldary Qazaqstan Respýblıkasy Parlamenti Senatynyń depýtaty qyzmetin atqardy.
Aýdannyń jańa basshysyn tanystyra otyryp, Asaıyn Baıhanov Aqtoǵaı aýdanynyń damý qarqyny oń dınamıkany kórsetip otyrǵanyn, alaıda birqatar baǵyttar boıynsha jumysty kúsheıtý qajet ekenin atap ótti. Eń aldymen óńir basshysy ınvestıtsııa tartý máselesine erekshe nazar aýdardy.
Qazir aýdan tartylǵan ınvestıtsııa kólemi boıynsha oblysta 10-orynda tur. Osyǵan baılanysty jańa ákimge ınvestorlarmen jumysty jandandyryp, jańa jobalardy iske asyrý jáne turaqty jumys oryndaryn ashý tapsyryldy. Sonymen qatar halyqtyń ómir súrýine qolaıly jaǵdaı jasaý jáne erikti qonys aýdarý baǵdarlamasyna qatysýshylardy tartý baǵytyndaǵy jumysty kúsheıtý mindeti júkteldi.
Agroónerkásip keshenin damytýǵa da erekshe kóńil bólý tapsyryldy. Bıyl egis alqaptary 5,3 myń gektarǵa ulǵaıdy. Alaıda qurǵaqshylyq jaǵdaıynda ónimdi saqtap qalý úshin barlyq qajetti sharalardy qabyldap, mal azyǵyn daıyndaý jáne egin jınaý naýqanyn ýaqytyly júrgizý qajet ekeni atap ótildi. Bıyl aýdan aýmaǵynda bıýdjet qarajaty esebinen 15 joba júzege asyrylyp jatyr.
Asaıyn Baıhanov olardyń sapaly ári belgilengen merzimde oryndalýyn qamtamasyz etýdi tapsyrdy. Negizgi mindetterdiń qatarynda jyl sońyna deıin Aqjol aýylyndaǵy sport kesheniniń qurylysyn aıaqtaý, Jambyl, Qaıran, Qaraoı, Ábjan, Jańatap, Jańabet jáne Jolaman aýyldarynyń kireberis joldardy jóndeý, sondaı-aq turǵyndardyń ótinishterin eskere otyryp, Jańabet jáne Jańatap aýyldarynyń ishki kóshelerin jóndeý máselesin pysyqtaý bar.
Budan bólek, jańa ákimge aýdan ortalyǵyndaǵy avtovokzal men qoǵamdyq monshany qalpyna keltirý, sondaı-aq basseın salý múmkindigin qarastyrý tapsyryldy. Sondaı-aq, jylý berý maýsymyna ýaqytyly daıyndalý, sý tasqynynyń aldyn alý sharalaryn iske asyrý jáne Sholaqsor aýylyna kireberis joldaǵy kópir qurylysy jobasyn 2027 jyldyń bıýdjetine engizý de kezek kúttirmeıtin mindetterdiń qatarynda ataldy.
Jıyn sońynda Asaıyn Baıhanov Ernur Áıtkenovtiń qyzmetine tabys tilep, aýdan ákiminiń jumysy eń aldymen turǵyndardyń ómir sapasyna oń áser etetin naqty nátıjelermen baǵalanýy tıis ekenin atap ótti.
