Pavlodar oblysynyń ákimi óńir ekonomıkasyn ártaraptandyrýǵa qatysty pikir aıtty
ASTANA. KAZINFORM — Pavlodar oblysynyń ákimi Asaıyn Baıhanov Memleket basshysy óńir ekonomıkasyn ártaraptandyrý boıynsha naqty mindet júktegenin aıtty. Sózinshe, bul baǵyttaǵy jospar jaqsy deńgeıde oryndalyp keledi.
— Osyǵan deıin Pavlodar óńiri ındýstrıaldy óńir retinde sanalsa, qazir agrarlyq-ındýstrıaldy dep aıtýǵa bolady. Sebebi árbir úshinshi keli kartop pen sábiz bizdiń oblysta óndiriledi. Sonymen qatar, maıly daqyldardyń biraz alqaby bar. Qazir sút óndirý salysyn damytýda kóshbasshy óńirlerdiń birimiz, — dedi A. Baıhanov Jibek Joly telearnasynyń «Ýáde» baǵdarlamasynda.
Onyń aıtýynsha, Ekibastuzda temirjol jáne metallýrgııa klasterin nyǵaıtýǵa erekshe ekpin qoıyldy.
— Ártaraptandyrý boıynsha eń basty baǵyt — qaıta óńdeý salasyn damytý. Shıkizatty shyǵarǵanymyzben, keıingi jyldary qaıta óńdeýge — metallýrgııada jabdyqtar men quraldardy daıyndaýǵa, munaı-hımııada ónimderdi jasaýǵa nazar aýdardyq. Budan bólek, kartoptyń 33 paıyzy Pavlodar oblysynda ósedi. Kartop boıynsha mol ónim alyp jatqanymyzdy eskersek, ony qaıta óńdeý jobalaryna ekpin qoıdyq. Sondyqtan chıpsy óndirýge qatysty ınvestıtsııalyq jobany iske asyryp jatyrmyz, — dedi óńir ákimi.
Eske salsaq, bıyl Qazaqstanda 3 mln tonnaǵa jýyq kartop jınaldy. Tutynýdyń medıtsınalyq normasyna sáıkes, ishki naryqty tolyqtaı qamtamasyz etý úshin 2 mln tonna kartop qajet.