Pavlodar oblysynyń 472 turǵyny bankrot dep tanyldy

PAVLODAR. KAZINFORM — Olardyń jalpy somasy 673,3 mln teńge qaryzy esepten shyǵarylǵan. Boryshkerlerdi bankrot dep taný týraly sheshimderdiń eń kóbi Pavlodar men Ekibastuz qalalaryna tıesili.

Memlekettik kirister organdary pavlodarlyqtardyń tólem qabilettiligin qalpyna keltirýdi jalǵastyryp otyr. 

Pavlodar oblysy boıynsha memlekettik kirister departamentinen habarlaǵandaı, óńirdegi 472 turǵynnyń 673,3 mln teńge qaryzy esepten shyǵarylyp, bankrot dep tanyldy.

«Memlekettik kirister departamenti bankterdiń, mıkroqarjy uıymdarynyń jáne kollektorlyq agenttikterdiń aldyndaǵy boryshtar boıynsha qoldanylatyn sottan tys bankrottyq rásimi boıynsha jumysty jalǵastyrýda. Pavlodarlyqtar tıisti zańnyń kúshine enýinen bastap sottan tys bankrottyqqa 3500-den astam ótinish berdi, onyń 472-si boıynsha oń sheshim shyǵaryldy. 134 adam óz ótinishterin keri qaıtaryp alsa, 3000 azamattyń ótinishi qanaǵattandyrylmady. 250-den astam pavlodarlyq sharttary sáıkes kelmeýine baılanysty qarjylyq monıtorıngten ótip jatyr», - málimdedi departamentten.

Boryshkerlerdi bankrot dep taný týraly sheshimderdiń eń kóbi Pavlodar (200) men Ekibastuz (173) qalalaryna tıesil bolyp otyr.