Pavlodar oblysynyń 20 myń oqýshysy «Qara jorǵa» bıledi
ASTANA. KAZINFORM — Naýryznama onkúndigi aıasynda Pavlodar oblysynda «Yntymaq» kúni atalyp ótti. Óńirde 20 myń oqýshy qatysqan aýqymdy fleshmob uıymdastyrdy. Bul týraly Oqý-aǵartý mınıstrliginiń baspasóz qyzmeti habarlady.
«Bı - júrektiń úni, ulttyń rýhy» atty fleshmob aıasynda oqýshylar «Qara jorǵa» bıin bir mezette bılep, kórermenderge áserli kórinis syılady.
Kóktemniń shýaqty kúnimen astasqan bul kórinis kórermen júregine jylylyq uıalatyp, Naýryz merekesiniń mánin tereńdete tústi.
«Qara jorǵa» - bı ǵana emes, ǵasyrlar qoınaýynan jetken mádenı mura, urpaqtan urpaqqa jalǵasqan rýhanı sabaqtastyqtyń sımvoly. Fleshmob arqyly jas býyn ulttyq qundylyqtarǵa degen qurmetin bildirip qana qoımaı, ortaq dástúr aıasynda birige alatyndaryn kórsetti. Bul ıgi bastama -jastardyń boıynda otansúıgishtik sezimdi nyǵaıtyp, ulttyq mádenıetti dáripteýdiń jarqyn úlgisi boldy.
Aıta ketelik jarty mıllıon qazaqstandyq bala bir mezgilde kópshilikke tanymal kúılerdi oryndaǵan edi.