Pavlodar oblysyndaǵy jergilikti bıýdjettiń 55,4 paıyzyn 15 kásiporyn qamtyp otyr

PAVLODAR. KAZINFORM - Byltyr bul kompanııalar qazynaǵa jalpy somasy 181,6 mlrd teńge alym-salyq tólegen. Al oblystyń bıylǵy bıýdjeti 550,6 mlrd teńgeni qurap otyr - dep habarlaıdy Kazinform tilishisi. 

Іri salyq tóleýshiler qatarynda «Pavlodar munaı-hımııa zaýyty», «KAZ Minerals Bozshakol», «Bogatyr Kómir», Ekibastuz GRES-1, GRES-2, «Qazaqstan alıýmınııi», «Aqsý ferroqorytpa zaýyty», Aqsý GRES stansasy, «Qazaqstan elektrolız zaýyty», «Pavlodarenergo», «KSP Steel», «ERG Servise» «Jańa Rosa», «Vostochnyı» kenishi, «Prommashkomplekt» jáne basqalary bar. Jalpy sany 15 kompanııa óńir bıýdjetiniń 55,4 paıyzyn qamtyǵan.

Óńirdiń shaǵyn jáne orta bıznesi bıýdjetti 111 mlrd teńgege nemese 34,3% paıyzǵa tolyqtyrǵan. Sondaı-aq, jeke tulǵalar, ıaǵnı óńir turǵyndary oblystyq bıýdjet qazynasyna shamamen 2,8 mlrd teńge nemese 0,9% paıyzdyq paıda ákelgen.

«Óńirlik bóliniste qarasaq, oblys bıýdjetiniń negizgi donory Pavlodar qalasy, ol jalpy tabystyń 71,5%, ekinshi Ekibastuz qalasy – 17,5% jáne odan soń Aqsý qalasy – 4,7% beredi. Oblystyń 3 qalasy bıýdjetke túsetin barlyq túsimderdiń 93,7%-yn qamtamasyz etedi. Al, oblystyń aýdandary arasynda eń úlken tabys - Baıanaýyl jáne Jelezınge tıesili» deıdi Pavlodar oblysynyń ákimi Asaıyn Baıhanov.

Oblys bıýdjeti 550,6 mlrd teńgeni quraıdy. Onyń ishinde, jergilikti kirister - 323,3 mlrd teńge nemese 58,7% paıyz. Al ózgesi sýbventsııa jáne respýblıkalyq bıýdjetten qoldaý - 227, 3 mlrd teńge.

Bul qarajattyń 47 paıyzy bilim berý, densaýlyq saqtaý, mádenıet, sport, áleýmettik qorǵaý jáne halyqty jumyspen qamtý salalaryna baǵyttalyp otyr.