Pavlodar oblysyndaǵy turmystyq qaldyqtardyń qanshasy qaıta óńdeledi

Pavlodar oblysy ekologııa departamentiniń málimetinshe, óńirde jyl saıyn turmystyq qaldyqtardyń úshten biri qaıta óńdelip otyr.

— Óńir aýmaǵynda jyl saıyn shamamen 300 myń tonna kommýnaldyq qaldyqtar túziledi. Onyń ishinde 100 myń tonnasy qaıta óńdeledi. ıAǵnı bul boıynsha paıyzdyq kórsetkish boıynsha — 33%, — dep habarlady Kazinform tilshisine ekologııa departamentiniń basshysy Qanat Musaparbekov.

Máselen, Pavlodar qalasyndaǵy polıgon aýmaǵynda «Popov» JK kásiporny plastıkalyq qaldyqtardy suryptaý jáne qaıta óńdeý jumystaryn júrgizedi. Nátıjesinde qoqys qaptary men plastık túıirshikteri óndiriledi. Al «Beısembaev» JK plastık qaldyqtaryn qaıta óńdep, qaıtalama shıkizat negizinde tazalaý tehnıkasyna arnalǵan şetkalar shyǵaryp otyr. «KazEcoProm» JShS qurylys qaldyqtaryn jınaý, suryptaý jáne qaıta óńdeý jumystaryn júzege asyrady. Kásiporyn alańynda usaqtaý-suryptaý qondyrǵysy, beton eritindisin daıyndaý toraby jáne kirpish óndirý tsehy ornalasqan. Qaıta óńdeý nátıjesinde beton bloktary, qıyrshyq tas jáne mıkrokremnezem túrindegi qaıtalama shıkizat alynady.

«InterRubberRecycling» JShS jáne «EkoGold» JShS paıdalanylǵan avtokólik shınalaryn jınaý, suryptaý jáne qaıta óńdeý jumystaryn júrgizedi. Nátıjesinde rezeńke úgindisi, metall kord, toqyma kord jáne rezeńke-polımerli plıtalar túrindegi qaıtalama ónim óndiriledi. 

«Gofrotara zaýyty» JShS makýlatýrany jınaý jáne qaıta óńdeýmen aınalysady. Óndiriletin ónimder qatarynda tórt qaqpaqty gofrlengen qoraptar, gofrlengen naýalar, qaǵaz paketter jáne jumyrtqaǵa arnalǵan tósemder bar. 

Sonymen qatar, «Tandem PV» JShS paıdalanylǵan kólik akkýmýlıatorlaryn jınaý jáne bastapqy óńdeý jumystaryn júrgizedi. Sondaı-aq tústi metaldardy (qorǵasyn pastasy men metall qorǵasyn) qaıta óńdeý óndirisin júzege asyryp keledi.

Eske sala keteıik, Pavlodarda zańsyz 10 qoqys úıindisi anyqtaldy.