Pavlodar oblysyndaǵy sýarmaly alqaptardyń aýmaǵy jyldam ósip keledi

PAVLODAR. KAZINFORM - Byltyr óńirdegi sýarmaly alqaptardyń aýmaǵy 166,9 myń gektardy quraǵan. Oblysta bul baǵytta 6 joba jalǵasyn tabady.

Ertis-Baıan óńiriniń fermerleri sýarmaly jerlerdi kóbeıtýge basa mán berip otyr. Sońǵy 4 jylda olardyń jalpy alańy 65 myń gektarǵa ósken. Tek byltyr 6 joba júzege asyp, jańadan 3,3 myń gektar iske qosylǵan. Sharýalar ınvestıtsııalyq sýbsıdııalaý baǵdarlamasy boıynsha bólingen 2,4 mlrd teńgeni tolyǵymen ıgerdi.

- Oblysta sýarmaly jerler jelisin keńeıtý máselesi - óte mańyzdy ári ózekti. Bıyl bul kórsetkishti 175 myń gektarǵa deıin jetkizýdi josparlap otyrmyz. Ol úshin taǵy 6 jobany jalǵastyratyn bolamyz. Bizdiń fermerler shetelde shyǵarylǵan 81 birlik sýarý mashınalaryn satyp aldy (Valley, Zimmatic, RKD, Bauer). Sondaı-aq, lımandyq sýarýdy damytý boıynsha jumystardy bastap kettik. Olardyń jalpy aýmaǵy 73,3 myń gektar, - deıdi Pavlodar oblysynyń ákimi Asaıyn Baıhanov.

Óńir aldaǵy alty jyl ishinde barlyq lımandyq sýarý júıelerin rekonstrýktsııalaýdy kózdep otyr. Mysal úshin, bıyl Baıanaýyl aýdanynda kólemi 6,7 myń, Maı aýdanynda 14,6 myń gektar bolatyn Qolybaev lımandyq júıesin qaıta jańartý jobasy qolǵa alynady.

Lımandyq alqaptar boıynsha memlekettik saraptama qorytyndysy osy jyldyń aqpan aıynda shyǵýy tıis. Odan soń Sý resýrstary mınıstrligimen birlesip, qarjylandyrý máselesi pysyqtalady.