Pavlodar oblysyndaǵy kásiporynda alty adam qaza tapty
ASTANA. KAZINFORM — Pavlodar oblysynyń Aqtoǵaı aýdanyndaǵy Jolaman aýylynda ornalasqan Aqtogai Milk JShS aýmaǵynda bolǵan qaıǵyly oqıǵaǵa baılanysty qylmystyq is qozǵaldy.
Aldyn ala málimet boıynsha, kásiporynnyń káriz qudyǵyndaǵy elektr sorǵysyn jóndeý jumystary kezinde alty adam qaza taýyp, taǵy bir jumysshy zardap shekken.
Oblystyq jedel járdem stansasynyń málimetinshe, shaqyrtý 20 shilde kúni saǵat 12:01–de túsken. Oqıǵa ornyna jetken medıtsına qyzmetkerleri 1963, 1975, 1983, 1998, 2006 jáne 2009 jyly týǵan alty er adamnyń oqıǵa ornynda kóz jumǵanyn anyqtady.
Al 1988 jyly týǵan taǵy bir er adam Aqtoǵaı aýdandyq aýrýhanasyna jetkizilgen.
Dárigerlerdiń málimetinshe, aýrýhanaǵa jetkizilgen naýqasqa ortasha aýyrlyq dárejesindegi kómirqyshqyl gazymen ýlaný dıagnozy qoıylǵan. Qazir oǵan qajetti medıtsınalyq kómek kórsetilip jatyr. Onyń jaǵdaıy turaqty, oblys ortalyǵyna tasymaldaýdy qajet etpeıdi.
Pavlodar oblystyq polıtsııa departamenti atalǵan derek boıynsha qylmystyq is qozǵalǵanyn habarlady.
— Atalǵan fakti boıynsha qylmystyq is qozǵaldy. Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy, — dep málimdedi polıtsııa.
Eske salaıyq, buǵan deıin Jezqazǵanda qudyqtaǵy gazdan jumysshy qaza tapqanyn habarlaǵanbyz.
