Pavlodar oblysyndaǵy «Ertis ormany» rezervatynda órt shyqty
ASTANA. KAZINFORM – Pavlodar oblysynda «Ertis ormany» memlekettik orman tabıǵı rezervaty aýmaǵynda shyqqan órt oqshaýlandy, dep habarlaıdy Ekologııa jáne tabıǵı resýrstar mınıstrligi.
7 shilde kúni saǵat 15:50-de Baıymbet ormanshylyǵynyń 124-oramynda órt tirkeldi.
Aldyn ala málimet boıynsha, órt aýmaǵy shamamen 1 gektardy qurady.
– Órtti sóndirý jumystaryna memlekettik orman kúzetiniń 17 qyzmetkeri, 10 tehnıka, sondaı-aq «Qazavıaormanqorǵaý» RMQK-nyń sý tógý qurylǵysymen jabdyqtalǵan ES-130 tikushaǵy jumyldyryldy, – delingen habarlamada.
Memlekettik orman kúzeti qyzmetkerleri men «Qazavıaormanqorǵaý» RMQK kúshteriniń jedel ári úılesimdi is-qımyly nátıjesinde órt qysqa ýaqyt ishinde oqshaýlandy.
Búgingi tańda «Ertis ormany» aýmaǵynda 5 orman órti tirkelgen.
Sońǵy kúnderi óńirde naızaǵaıly fronttardyń ótýine baılanysty orman órtteriniń týyndaý qaýpi saqtalyp otyr.
– Osyǵan baılanysty memlekettik orman kúzeti kúsheıtilgen daıyndyq rejıminde jumys istep jatyr, – dep atap ótti vedomstvodan.
Aıta keteıik, Atyraýdaǵy qamys órti 69 gektardy sharpydy, órt tolyq sóndirilgen joq.
