Pavlodar oblysyndaǵy energetıka nysandary qysqa qanshalyqty daıyn
PAVLODAR. KAZINFORM — Ertis-Baıan óńirinde 476 qazandyq bar. Jylytý maýsymyna senimdi kirý úshin jabdyqtar men otynnyń qajetti qory qamtamasyz etilgen.
Óńirlik energetıka jáne turǵyn úı-kommýnaldyq sharýashylyq basqarmasynyń málimetinshe, oblystaǵy 476 qazandyqtyń 473-i búginde jylýǵa qosylýǵa daıyn tur. Ázirlik 99%-dy kórsetip otyr.
— Bilim berý salasyndaǵy — 566, densaýlyq saqtaý salasyndaǵy 286 energetıkalyq nysan qysqa tolyqtaı daıyn. Energııa kózderinde jylytý maýsymyna senimdi kirý úshin jabdyqtar men otynnyń qajetti qory qamtamasyz etilgen. Bıyl energııa stansalardaǵy negizgi jabdyqtardyń 19-yna jóndeý júrgizildi, — dep habarlady Kazinform tilshisine Pavlodar oblystyq energetıka jáne turǵyn úı-kommýnaldyq sharýashylyq basqarmasynyń basshysy Erjan Imanzaıypov.
Aımaqtaǵy energetıkalyq keshende jalpy qýaty 8 542 MVt bolatyn 7 iri elektr jáne jylý stansalary bar. Jyl saıyn olar shamamen 35 mln tonna kómir jáne 30 myń tonna mazýt tutynady. Kómirdiń negizgi jetkizýshileri — «Bogatyr Kómir» JShS jáne «Shyǵys» kenishi. Mazýt «KCEG» JShS, «Maten Petroleým» JShS, «Bozachı neft treıdıng» JShS, «Tenge Oil Gas» JShS jáne t. b. kásiporyndarmen jetkiziledi.
Eske sala keteıik, Pavlodar oblysynda qyrkúıektiń alǵashqy onkúndiginde jylý berile bastaýy múmkin.
