Pavlodar oblysyndaǵy aýyldyń birinde tozǵan bóget qalpyna keltirildi
PAVLODAR.KAZINFORM – Pavlodar oblysyndaǵy Tórtqudyq aýylynda qıraýdyń aldynda turǵan bóget qalpyna keltirildi. Eldi mekennen 7 shaqyrym qashyqtyqta ornalasqan bul bógettiń jergilikti turǵyndar úshin mańyzy zor. Aýyldyqtardyń mal sharýashylyǵymen aınalysyp, otbasyn asyraýǵa múmkindik beretin jalǵyz sý kózi osy bóget, dep habarlaıdy Kazinform agenttiginiń tilshisi.
Sońǵy ýaqytqa deıin bóget qıraýǵa shaq qalyp, Kúrti sý qoımasynyń tolyqtaı qurǵap qalý qaýpi tóngen edi. Ásirese sońǵy jyly sý deńgeıi aıtarlyqtaı tómendedi. Bıylǵy jazda aýyl ákimi men Tórtqudyq turǵyndarynyń ótinishinen keıin bógetti qalpyna keltirý jumysyn KAZ Minerals Bozshakol kompanııasy óz qolyna aldy.
Uzyndyǵy 70, eni 7 metr bolatyn bóget barlyq gıdrotehnıkalyq talaptarǵa saı kúsheıtildi. Jobanyń quny – 100 myń dollar.
- Sý resýrstaryn únemdeý sońǵy jyldary ózekti máselelerdiń biri edi. KAZ Minerals Bozshakol kompanııasynyń arqasynda turǵyndarymyzdy alańdatqan bir sharýa sheshimin tapty. Endi biz sý qoımasynyń saqtalyp, malshylarymyzdyń jaıylym úshin alańdamasyna senimdimiz, - deıdi aýyl ákimi Janar Ýalınova.
Másele sheshildi. Jóndeý jumystarynan keıin, 11 qazannan bastap sý qoımasy qaıta tola bastady.
- Biz úshin sý qoımasy – tirshilik kózi. Bóget jóndelgennen keıin endi jaıylymdarymyz men malymyz sýsyz qalmaıdy. Bizge kómek qolyn sozǵan kompanııa men qoımany qalpyna keltirýge járdemdesken barshańyzǵa alǵysymyz sheksiz, - deıdi Tórtqudyq aýylynyń turǵyndary.
Bógetti qalpyna keltirý jobasy bıznestiń áleýmettik jaýapkershiliginiń jarqyn kórsetkishi boldy. Aýyl turǵyndary jóndeý jumysynyń alǵashqy nátıjelerin kóre bastady.
- Biz nysanǵa alǵash kelgende bógettiń zaqymdalǵan bólikterinen basqa, aldaǵy ýaqytta buzylýy múmkin álsiz tustaryn da anyqtadyq. Barlyǵyn muqııat tekserip, jospar qurǵannan keıin jumysty joǵary sapada ári qaýipsizdiktiń barlyq talabyna saı júzege asyrdyq, - KAZ Minerals Bozshakol kompanııasynyń bas dırektory Djeımı Karattı.
Kompanııa jetekshisi jobany qysqa merzimde júzege asyrǵan zııandy qaldyqtar qoımasynyń jumysshylary men «Elevatormelstroı» AQ qyzmetkerlerine erekshe alǵysyn bildirdi.
- Biz oblys turǵyndarynyń aldyndaǵy áleýmettik jaýapkershiligimizdiń sheńberinde osyndaı bastamalarǵa atsalysqanymyzǵa qýanyshtymyz. KAZ Minerals árdaıym «jaqsy kórshi» bolýǵa tyrysady jáne biz búgin sony kórsete aldyq dep oılaımyn. Bizdiń rýdnıktiń jumys isteý merzimi 40 jyldan asady, al bógettiń odan da uzaq turaryna senimdimin, - dep málimdedi KAZ Minerals Bozshakol kompanııasynyń bas dırektory Djeımı Karattı.