Pavlodar oblysynda júk kóligi men jeńil kólik soqtyǵysyp, eki adam mert boldy
ASTANA. KAZINFORM — Pavlodar oblystyq polıtsııasy júrgizýshi men jolaýshynyń qaıtys bolýyna baılanysty kólik apaty faktisi boıynsha qylmystyq is qozǵady.
Vedomstvo málim etkendeı, qaıǵyly oqıǵa 11 qazan kúni «Omby–Maıqapshaǵaı» avtojolynyń Qyzylqoǵam aýylynan 3 shaqyrym jerde bolǵan.
— Aldyn ala málimet boıynsha «VAZ-2110» markaly avtokóliktiń júrgizýshisi qolaısyz aýa raıy jaǵdaıynda kólikti basqara almaı, qarsy qozǵalys jolaǵyna shyǵyp, júk kóligimen betpe-bet soqtyǵysqan. Oqıǵanyń mán-jaıy men sebepteri tergeý barysynda anyqtalatyn bolady, — delingen habarlamada.
Polıtsııa departamenti osyndaı oqıǵalardyń aldyn alý maqsatynda jol qozǵalysyna qatysýshylarǵa jol júrý erejelerin qatań saqtaýdy, jyldamdyq rejımin tómendetýdi, ásirese kólik qozǵalysy qarqyndy ýchaskelerde abaı bolýdy jáne kólik quralynyń tehnıkalyq jaǵdaıyn únemi qadaǵalap otyrýdy eskertedi.
Osydan buryn Pavlodarda jol apatynan júrgizýshi qaza taýyp, tórt jolaýshy jaraqat alǵanyn jazǵan edik.