Pavlodar oblysynda jóndelmegen jol úshin 45 mln teńge aýdarylǵan

ASTANA. KAZINFORM – Pavlodar oblysynyń Ertis aýdanynda aýylishilik joldardy jóndeýge bólingen 45 mln teńge bıýdjet qarajatyn jymqyrý faktisi anyqtaldy, dep habarlady Pavlodar oblysynyń prokýratýrasy.

Aqtóbede bir jarym shyqyrymdyq jol qurylysy eki jylǵa sozyldy
Foto: Altynaı Saǵyndyqova/Kazinform

Ertis aýdanynyń prokýratýrasy avtomobıl joldaryn salý jáne jóndeý kezinde zańdylyqtyń saqtalýyna tekserý júrgizgen.

Tekserý barysynda Ýspen aýyldyq okrýgi ákiminiń apparaty is júzinde jóndelmegen aýylishilik jol ýchaskesi úshin «MKK-Elıt Stroı» JShS-ne 45 mln teńgeni zańsyz aýdarǵany anyqtaldy.

– Ertis aýdanynyń prokýratýrasy avtomobıl joldaryn salý jáne jóndeý kezinde zańdylyqtyń saqtalýyna júrgizgen tekserý barysynda asa iri mólsherde bıýdjet qarajatyn jymqyrý faktisin anyqtady. Atap aıtqanda, Ýspen aýyldyq okrýgi ákiminiń apparaty jóndelmegen aýylishilik jol ýchaskesi úshin «MKK-Elıt Stroı» JShS-ne zańsyz túrde 45 mln teńge aýdarǵan. Atalǵan fakti boıynsha prokýratýra ákimdik pen merdiger uıymnyń laýazymdy tulǵalaryna qatysty Qylmystyq kodekstiń 189-baby boıynsha sotqa deıingi tergep-tekserýdi bastady, – delingen prokýratýra habarlamasynda.

Qazirgi ýaqytta tergeýdi Pavlodar oblysy boıynsha Ulttyq qaýipsizdik komıtetiniń departamenti júrgizip jatyr.

Qylmystyq-protsestik kodekstiń 201-babyna sáıkes sotqa deıingi tergep-tekserýdiń ózge málimetteri jarııa etilmeıdi.

Aıta keteıik, buǵan deıin Aqmola oblysynyń Nıkolskoe aýylynda jol jóndeýge bólingen 78 mln teńgeniń jymqyrylǵany anyqtalǵan edi. Atalǵan derek boıynsha da sotqa deıingi tergeý bastaldy.