Pavlodar oblysynda jylý qubyrlaryn jańartýǵa 31,9 mlrd teńge bólinedi
PAVLODAR. KAZINFORM - Óńir boıynsha jylý jetkizetin júıelerdiń 79,7%-y tozyp tur. Qazyna qarajaty esebinen bıyl 30 km jylý qubyry jańartylýy kerek.

Ertis-Baıan óńirindegi úsh qalada – Pavlodar, Ekibastuz jáne Aqsýda jylý jelileri meılinshe tozyp tur. Qazyna qarajaty esebinen jyl saıyn tam-tumdap jóndeý júrgizilgenimen jeke fırmalar men tulǵalar júıeniń jaǵdaıyna asa bas qatyrmaıdy. Tozýdyń jyl saıyn ulǵaıýyna bul da úlken sebepker. Sońǵy úsh jylda Pavlodar qalasyndaǵy keń aýqymdy jańartý jumystaryna qaramastan tozý kórsetkishi nebári 7 %-ǵa ǵana jaqsarǵan (2022 jyly – 89 paıyz).

Aımaqtaǵy jylýmen jabdyqtaý jelileriniń uzyndyǵy 1438 kılometrdi qurasa, basym bóligi Pavlodar qalasyna tıesili - 828,1 km.
Óńirlik energetıka jáne turǵyn úı-kommýnaldyq sharýashylyq basqarmasynyń málimetine súıensek, eń kúrdeli másele Ekibastuz qalasynda – jylýmen jabdyqtaý jelileriniń jalpy tozýy-79,7%. Pavlodar qalasynda bul kórsetkish - 81,8% bolsa, Aqsýda 54,5%-dy qurap otyr. Al sý jetkizetin qubyrlardyń tozýy - 47,1%. Bul rette jańartýdy eń kóp qajet etetini – oblys ortalyǵy, mundaǵy sý qubyrlarynyń 70,2 paıyzy kónerip ketken.

- 2025 jyly jalpy uzyndyǵy 30 km jylýmen jabdyqtaý jelilerin qaıta jańartý jáne salý boıynsha 8 jobaǵa jobalaý-smetalyq qujattamasy bar. Jobalardy iske asyrý úshin 31,9 mlrd teńge qarastyrylǵan. Onyń ishinde Pavlodar qalasy boıynsha 15,1 mlrd teńge somasyna jylýmen jabdyqtaý jelilerin (12 km) salý jáne qaıta jańartý boıynsha 3 joba, Ekibastuz boıynsha 11,3 mlrd teńgege 3 joba (5,5 km), Aqsý boıynsha 5,5 mlrd teńge somasyna 2 joba (12,5 km). Sondaı-aq, sýmen jabdyqtaý boıynsha 4,5 mlrd teńge somasyna 2,4 km jelini qaıta jańartý boıynsha 5 jobaǵa jobalaý-smetalyq qujattamasy bar,-dep jaýap berdi Kazinform tilshisine óńirlik energetıka jáne turǵyn úı-kommýnaldyq sharýashylyq basqarmasynyń Erjan Imanzaıypov.

Eske sala keteıik, 2022 jyldyń 27 qarashasynda Ekibastuz JEO-synda apat bolyp, qala turǵyndary qatty aıazda jylýsyz qalǵan edi.
Al ótken jyldyń jeltoqsan aıynda Aqsýdyń jylý júıesinde apat bolyp, úılerde jylý tómendep ketti.
Byltyr QR Úkimeti Pavlodar, Ekibastuz jáne Aqsý qalalarynda jylý jelilerin salýǵa 9 mlrd teńge bóldi.

