Pavlodar oblysynda jylyna 75 myń tonna makýlatýra óńdeıtin zaýyt salynyp jatyr
ASTANA. KAZINFORM - Pavlodar oblysynda «QazRoyalPak» JShS-niń makýlatýrany qaıta óńdeý jobasy iske asyrylyp jatyr. Kásiporyn tolyq qýatyna shyqqannan keıin jylyna 75 myń tonnaǵa deıin qaǵaz qaldyqtaryn qaıta óńdeı alady, dep habarlaıdy QR Ekologııa mınıstrliginiń baspasóz qyzmeti.
Jobanyń quny shamamen 10,8 mlrd teńgeni quraıdy. Joba «Jasyl damý» AQ baǵyttaǵan kádege jaratý tólemderi esebinen qarjylandyryldy. Qarajat tolyq kólemde ıgerildi.
Qazirgi ýaqytta joba bekitilgen kestege sáıkes iske asyrylyp jatyr. Óndiristik tsehtardyń qurylysy aıaqtalýǵa jaqyn. Sonymen qatar jabdyqtarǵa arnalǵan irgetastardy salý jumystary júrgizilýde. Nysandy 2028 jyly paıdalanýǵa berý josparlanǵan.
«QazRoyalPak» JShS dırektory Gúlnara Qaıdarovanyń aıtýynsha, jobany iske asyrý kásiporynnyń óndiristik múmkindikterin edáýir keńeıtýge múmkindik beredi.
-Biz úshin bul joba óndiristi damytýdyń mańyzdy kezeńi. Óndiristik qýatty arttyrý makýlatýranyń edáýir kóp kólemin qaıta óńdeýge jáne qaıtalama shıkizatty óndiristik tsıklde tıimdi paıdalanýǵa múmkindik beredi, – dedi Gúlnara Qaıdarova.
Jobany iske asyrý Pavlodar oblysynda makýlatýrany qaıta óńdeý boıynsha qosymsha óndiristik qýattardy qalyptastyrýǵa jáne qaǵaz qaldyqtaryn qaıta aınalymǵa tartý kólemin arttyrýǵa múmkindik beredi.
QR Ekologııa jáne tabıǵı resýrstar mınıstrliginiń qoldaýymen «Jasyl damý» AQ qaldyqtardy qaıta óńdeý salasyn damytýǵa jáne zamanaýı ınfraqurylym qalyptastyrýǵa baǵyttalǵan jobalardy qarjylandyrýdy jalǵastyryp keledi.
Eske sala keteıik, «Jasyl damý» AQ kádege jaratý tólemderi esebinen jalpy somasy shamamen 116 mlrd teńgeni quraıtyn 30 jobany qarjylandyrdy. Mundaı jobalardy iske asyrý Qazaqstan Respýblıkasynyń Ekologııalyq kodeksine sáıkes qaldyqtardy basqarýdyń zamanaýı ınfraqurylymyn damytýǵa, qaıta óńdeý kólemin arttyrýǵa, qaldyqtardy kómý kólemin azaıtýǵa jáne qaıtalama shıkizatty ekonomıkalyq aınalymǵa tartýǵa yqpal etedi.
Osyǵan deıin Almatyda makýlatýra óńdeıtin kásiporyndardyń qýaty jylyna 200 myń tonnadan asatyny týraly jazdyq.
