Pavlodar oblysynda jazǵy lagerlerdiń baǵasy qalaı ózgerdi
PAVLODAR. KAZINFORM — Óńirlik bilim berý basqarmasynyń málimetinshe, tólem qunyn aıqyndaý kezinde balalardyń tolyqqandy jáne qaýipsiz demalysy úshin qajetti shyǵyndar kesheni eskeriledi.
Pavlodar oblysynda barlyǵy 11 balalar lageri bar, onyń 9-y memlekettik, 2-ýi jekemenshik. Kópshiligi qala syrtynda ornalasqan. Bul lagerler jalpy sany 5 myńnan astam oqýshyny qamtıdy jáne olardyń barlyǵy qabyldaýǵa daıyn tur.
Lagerlerdegi tólem baǵasy bıyl birshama ózgergeni baıqaldy. Jyl buryn bul qyzmet bir bala úshin 9 800 teńgege bolsa, bıyl 12 650 teńgeni qurap otyr.
— Tólem qunyna balalardyń tamaqtaný, turý jáne jatyn bólmelerin kútip-ustaý shyǵyndary, pedagogıkalyq, tárbıelik, medıtsınalyq, qyzmet kórsetýshi jáne tehnıkalyq personaldyń eńbekaqysy, bilim berý, mádenı-buqaralyq, sporttyq jáne bos ýaqytty uıymdastyrý is-sharalaryn uıymdastyrý shyǵyndary, medıtsınalyq súıemeldeý jáne sanıtarlyq-epıdemıologııalyq talaptardyń qamtamasyz etilýi kiredi, — dep atap ótti Pavlodar oblysynyń bilim berý basqarmasynan.
Budan bólek, joldama qunyna kommýnaldyq qyzmetter, sharýashylyq taýarlaryn, keńse taýarlaryn satyp alý, kúzetke jumsalatyn shyǵyndar, lagerdiń materıaldyq-tehnıkalyq bazasyn kútip-ustaý jáne oǵan qyzmet kórsetý shyǵyndary da kiredi.
Bir jyl ishinde mektep janyndaǵy lagerlerdegi qyzmet kórsetý quny óskeni anyqtaldy, ıaǵnı bir balaǵa kúnine 945 teńgeden 1 210 teńgege deıin ósti. Atap óterligi, bul baǵa barlyq oqý oryndary úshin birdeı. Úsh mezgil tamaqtanýy bar, uzaqtyǵy 15 kún bolatyn bir maýsym ata-analarǵa 18 myń teńgege túsedi.
Eske sala keteıik, Ertis boıynda 110 myńnan astam oqýshy jazǵy demalyspen qamtylady.
