Pavlodar oblysynda janyp ketken aýyl mektebiniń ornyna jańa ǵımarat salynady
PAVLODAR. KAZINFORM - Ertis aýdany Bulanbaı aýylynda otqa oranyp, túgi qalmaı janyp ketken mekteptiń ornyna shaǵyn jınaqtaǵy mektep salynady.

Bul týraly Pavlodar oblysy bilim berý basqarmasynyń basshysy Samal Aıtqazına habarlady.
- Bulanbaı aýylyndaǵy negizgi mektep órtke oranǵany bárimizge málim. Sol kúni oqıǵa ornyna baryp, jaǵdaıdy óz kózimmen kórgen bolatynmyn. Aýyl turǵyndarymen, ustazdarmen jáne qyzmetkerler ujymymen kezdesip, mektepte bilim alyp júrgen oqýshylardyń aldaǵy kúnderi qaıda oqıtyny jaıly naqtylap alǵan edik. Oblys ákiminiń orynbasary Aıgúl Malıkovamen oqıǵa ornyna arnaıy taǵy bir márte issaparmen baryp keldik. Aıgúl Qaıyrtasqyzy oblys ákimi Asaıyn Baıhanovtyń tapsyrmasymen órtenip ketken mekteptiń ornyna bala sanyna shaqtap, mektep salynatynyn jetkizdi. Mekteptiń qaıta qalpyna kelýi tek bilim berý mekemesi ǵana emes, sonymen birge aýyldyń áleýmettik ınfraqurylymyn da jańartý boıynsha mańyzdy qadam bolmaqshy, - deıdi basqarma basshysy.
Jańa shaǵyn jınaqtalǵan mekteptiń qurylysyn bastaý úshin jobalyq-smetalyq qujattar daıyndalyp, bıýdjetten qarajat bólinedi.
Shaǵyn-ortalyqta tárbıelenip jatqan 8 búldirshin de ary qaraı tálim alady.
Eske sala keteıik, Pavlodarda qatty jel saldarynan aýyl mektebi túgi qalmaı janyp ketti.