Pavlodar oblysynda jańa mektep ashyldy
PAVLODAR. KAZINFORM - Jańa bilim uıasy 120 oqýshyǵa laıyqtalǵan. Mektep zamanaýı jabdyqtarmen, STEM-zerthanamen, IT, robototehnıka jáne 3D-modeldeý synyptarymen jabdyqtalǵan.
Pavlodar aýdanynyń Sychevka aýylynda jańa mektep ashyldy. Ǵımarat sonaý 1975 jyly salynǵan, apattyq jaǵdaıda turǵan eski bilim berý oshaǵynyń ornynda boı kóterdi, dep habarlady Pavlodar oblysy ákiminiń baspasóz qyzmetinen.
Zamanaýı úlgidegi 120 oryndyq mekteptiń saltanatty ashylý rásimine qatysqan Pavlodar oblysynyń ákimi Asaıyn Baıhanov oqýshylarǵa jaqsy bilim alyp, zor jetistikterge jetýge tilektestik bildirdi.
— Memleket basshysy „Elimizdiń damýy — jas urpaqqa baılanysty“ dep atap ótken bolatyn. Biz oqý oryndarynyń ınfraqurylymyn jańartýǵa kóp kóńil bólýdemiz. Sychevka aýylyndaǵy mektep — bul aımaǵymyz boıynsha apatty jaǵdaıdaǵy eski ǵımarattardyń ornyna salynǵan úshinshi mektep. Biz osy jyly da basqa eldi mekenderde mektepter men balabaqshalar salýdy jalǵastyramyz. Bul bizdiń balalarymyz úshin aýylda jaıly jaǵdaı jasaýdyń taǵy bir qadamy bolmaq, — dep atap ótti ákim.
Sonymen qatar, ol ERG tobynyń aktsıonerlerine de alǵysyn bildirdi. Jańa mekteptiń qurylysy ERG men Pavlodar oblysynyń ákimdigi arasynda jasalǵan memorandým aıasynda júrgizildi. Jobaǵa salynǵan ınvestıtsııa 1,08 mlrd teńgeni qurady.
Aýmaǵy 1498 sharshy metrdi quraıtyn eki qabatty ǵımarat zamanaýı jabdyqtarmen, STEM-zerthanamen, IT, robototehnıka jáne 3D-modeldeý synyptarymen jabdyqtalǵan, led-dıspleıi bar májilis zaly, sport zaly, ashana jáne kitaphana ornalasqan. Tsıfrly mıkroskoptar men vırtýaldy-tsıfrlyq zerthana satyp alyndy. Sondaı-aq, mektepte «Erketaı» shaǵyn ortalyǵy men mektepke deıingi bilim berý ortalyǵy ashyldy.
