Pavlodar oblysynda zeınetkerdi alaıaqtardan qutqarǵan taksı júrgizýshisi marapattaldy
PAVLODAR. KAZINFORM — Pavlodar oblysynda zeınetkerdi alaıaqtardyń qurbany bolýdan qutqarǵan qyraǵy taksı júrgizýshisi marapattaldy, - dep habarlaıdy Polisia.kz.
Pavlodar oblysy polıtsııa departamenti bastyǵynyń birinshi orynbasary Bolat Nurseıitov azamattyq qyraǵylyǵy men belsendi ustanymy úshin taksı júrgizýshisi Alekseı Bortovoıǵa alǵysyn bildirdi. Sondaı-aq oǵan Alǵys hat pen vedomstvolyq qolsaǵat tabystaldy. Ol bul árekettiń el turǵyndary tarapynan joǵary baǵalanǵanyn atap ótti.
— Sizdiń qyraǵylyǵyńyzdyń arqasynda iri kólemdegi alaıaqtyqtyń aldyn alý múmkin boldy jáne zeınetkerdiń qarajaty saqtalyp qaldy. Bul — ata-ananyń bergen durys tárbıesiniń, otansúıgishtiktiń ári ózgeniń taǵdyryna beıjaı qaramaýdyń aıqyn kórinisi, - dedi Bolat Nurseıitov.
Aıta keteıik, 22 jeltoqsan kúni keshki ýaqytta taksı júrgizýshisi alaıaqtardyń qurbany bola jazdaǵan zeınetkerdi ýchaskelik polıtsııa pýnktine jetkizgen.
— Keshki ýaqytta tapsyrys tústi, bir zatty jetkizý qajet boldy. Alaıda jetkizý aqysynyń tym joǵary bolýy kúmán týdyrdy. Barǵan kezde jóneltýshiniń jasy úlken áje ekenin kórdim. Ne jiberip jatqanyn suraǵanymda, ol naqty jaýap bere almaı, asyǵyp, qobaljyp turdy. Bir nárseniń durys emestigin sezip, ájeni kólikke otyrǵyzyp, polıtsııaǵa apardym. Buǵan deıin polıtsııa qyzmetkerleri alaıaqtardyń osyndaı shemalary týraly eskertken bolatyn. Sondyqtan barlyǵyn teksergen jón dep sheshtim. Polıtsııada onyń alaıaqtardyń qurbany bolǵany jáne belgisiz adamdarǵa 8,5 mln teńge bermek bolǵany anyqtaldy. Nelikten aqshany beıtanys adamdarǵa bergisi kelgenin ózi de túsindire almady. Meniń ornymda kez kelgen adam osylaı ister edi dep oılaımyn. Eń bastysy — bári aman-esen, - dedi Alekseı Bortovoı.
Polıtsııa azamattardy barynsha saq bolýǵa shaqyrady: eshbir memlekettik organ aqshany «saqtaýǵa» almaıdy jáne kýrer jibermeıdi. Mundaı qońyraýlardyń barlyǵy — alaıaqtardyń áreketi.
Eske sala keteıik, budan buryn bıyl alaıaqtar 6,1 myńnan astam azamatty aldaǵanyn jazǵanbyz.