Pavlodar oblysynda zańsyz aınalymnan asa iri mólsherde esirtki zaty tárkilendi

PAVLODAR. KAZINFORM — Tintý barysynda kúdiktiden salmaǵy 11 keli bolatyn ósimdik tektes esirtki zaty tabylyp, tárkilendi. Bul týraly ІІM baspasóz qyzmeti habarlady. 

Pavlodar oblysynda uıymdasqan qylmysqa qarsy kúres basqarmasynyń jedel qyzmetkerleri oblystyq prokýratýranyń úılestirýimen júrgizgen arnaıy jedel is-sharalar kesheni nátıjesinde Aqsý qalasynda er adam ustaldy. Tintý barysynda kúdiktiden salmaǵy 11 keli bolatyn ósimdik tektes esirtki zaty tabylyp, tárkilendi.

— Atalǵan derek boıynsha esirtki quraldaryn, psıhotroptyq zattardy, olardyń analogtaryn zańsyz ıemdený, saqtaý, tasymaldaý, ótkizý maqsatynda jóneltý ne ótkizý faktisi boıynsha qylmystyq is qozǵaldy. Sot sanktsııasymen kúdikti qamaýǵa alyndy, — dep habarlady Pavlodar oblysy PD UQQKB bastyǵy Ǵabıt Qabdrahmanov.

Aıta ketelik sońǵy bes jylda Qazaqstanda 400-den astam esirtki zerthanasy joıyldy.