Pavlodar oblysynda úsh sorǵy stantsııasy sýdy zańsyz paıdalanǵany anyqtaldy

PAVLODAR. KAZINFORM — Sý resýrstary jáne ırrıgatsııa mınıstrligi zańsyz sý alýǵa qarsy jumystardy jalǵastyryp keledi. Ertis basseındik ınspektsııasy Pavlodar oblysynyń Aqsý qalasyndaǵy aýyldyq aımaqta jáne Ertis aýdanynda ornalasqan úsh sorǵy stantsııasyn anyqtady. Bul týraly vedomstvonyń baspasóz qyzmeti málim etti.

Tekserý nátıjesi boıynsha quqyq buzǵan barlyq azamat ákimshilik jaýapkershilikke tartyldy. Olarǵa jalpy somasy shamamen 600 myń teńge kóleminde aıyppul salyndy. Sonymen qatar basseındik ınspektsııa mamandary óńirdiń sharýalary arasynda túsindirý jumystaryn júrgizip jatyr.

– Basseındik ınspektsııalardyń barlyǵy sýdy paıdalaný zańnamasynyń buzylýyna jol bermeý úshin turaqty túrde monıtorıng júrgizedi. Sondaı-aq bıyl maýsym aıynda qabyldanǵan sýarmaly sýdy paıdalaný erejeleri, arnaıy sý paıdalaný ruqsatyn alý jáne sý únemdeý tehnologııalaryna kóshý qajettiligi boıynsha sý paıdalanýshylarmen túsindirý jumystary júrgizilip jatyr, – dedi Ertis basseındik ınspektsııasynyń basshysy Medet Jádigeruly.

Zańsyz sý paıdalaný máselesimen kúresý úshin Sý resýrstary jáne ırrıgatsııa mınıstrligi birqatar shara qabyldaǵanyn eske sala keteıik. Onyń ishinde sý zańnamasyn buzǵandarǵa jaýapkershilikti kúsheıtý jáne sýarmaly sýdy paıdalaný erejeleri bar. Bul erejelerge sáıkes, tıisti kelisimshartsyz sý tutynǵany nemese sý jetkizýshimen kelispeı egis daqyldarynyń túrin ózgertkeni úshin aıyppul salynady.