Pavlodar oblysynda úsh sábı kúıik shalyp, aýrýhanaǵa tústi
PAVLODAR. KAZINFORM - Ótken demalys kúnderi Pavlodar óńirinde úsh bala kúıik shalyp, oblystyq balalar aýrýhanasyna jetkizildi. Bul týraly oblystyq jedel medıtsınalyq járdem stansasynan habarlady.
Medıtsınalyq brıgadalar shaqyrtý túsken oryndarǵa 9–10 mınýt ishinde jetip, balalarǵa alǵashqy kómek kórsetken.
- Pavlodar qalasynda bes aılyq sábı qyzyp turǵan jelim pıstoletine betiniń ushyn kúıdirip alǵan. Atameken kentinde toǵyz aılyq bala ystyq peshke qolyn tıgizip, alaqany men saýsaqtaryn kúıdirgen. Al Kenjekól aýylynda bir jasar bala ústine ystyq shaı quıylǵan keseni aýdaryp alyp, keýde tusy kúıgen. Úsh jaǵdaıda da balalarǵa alǵashqy medıtsınalyq kómek kórsetilip, olar oblystyq balalar aýrýhanasyna jetkizildi, - dep málimdedi óńirlik jedel járdem stansasynan.
Oblystyq jedel járdem stansasy basshysynyń orynbasary Irına Mışenkonyń aıtýynsha, kúıik – sábıler arasynda jıi kezdesetin turmystyq jaraqattardyń biri.
- Mundaı jazataıym oqıǵalardyń aldyn alý úshin ystyq sýsyn quıylǵan keselerdi, qosýly elektr qurylǵylaryn jáne plıta ústindegi ydystardyń tutqalaryn balalardyń qoly jetpeıtin jerde ustaý qajet. Sondaı-aq jylytý peshteri men jylytqyshtarǵa qorǵanysh qalqandar ornatqan jón. Balaǵa qaýipti zatqa qolyn jetkizý úshin birneshe sekýndtyń ózi jetkilikti, – deıdi maman.
Mamandar ata-analardy balalardy ystyq zattar men turmystyq elektr qurylǵylarynyń janynda qaraýsyz qaldyrmaýǵa shaqyrady.
Eske sala keteıik, Pavlodarda mektep oqýshylary ótkir ıisti hımııalyq preparattan ýlanyp qaldy.
