Pavlodar oblysynda tutynýshylarǵa 88 mln teńgeden astam qarajat qaıtaryldy
PAVLODAR. KAZINFORM - Bıylǵy 10 aıda óńirlik saýda jáne tutynýshylardyń quqyqtaryn qorǵaý departamentine turǵyndardan 2065 ótinish túsken. Shaǵymdardyń jartysyna jýyǵy bólshek saýdaǵa qatysty.
Jyl basynan tutynýshylardyń quqyǵyn qorǵaý baǵytynda júrgizilgen jumystardyń nátıjesinde satyp alýshylarǵa 88 mln teńgeden astam qarajat qaıtarylǵan.
Óńir turǵyndary kóbine turmystyq tehnıka, aıaq kıim men kıimdi qaıtarý nemese aıyrbastaý máseleleri boıynsha shaǵymdanǵan. Arasynda quny 20 mln teńgege deıin jetetin avtokólikterge qatysty daýly jaǵdaılar da bar.
Mundaı máselelerdiń barlyǵy birdeı tekserýge ulasa bermeıdi. Kóp jaǵdaıda kásipkerlerge zań talaptary túsindirilgennen keıin olar aqshany qaıtarýǵa nemese taýardy aıyrbastaýǵa kelisedi.
– 10 aıda departamentke 2065 ótinish kelip tústi. Shaǵymdardyń basym bóligi, ıaǵnı shamamen 48 paıyzy bólshek saýda salasyna tıesili. Taǵy 18 paıyzy turmystyq qyzmetter men elektrondyq saýdaǵa qatysty. Turmystyq qyzmet kórsetý salasynda turǵyndar kóbine terezelerdi sapasyz ornatý, jumysty belgilengen merzimde oryndamaý jáne jıhaz jasaý kezindegi kemshilikterge shaǵymdanady, – deıdi Pavlodar oblysy saýda jáne tutynýshylardyń quqyqtaryn qorǵaý departamenti basshysynyń orynbasary Nursulý Áýbákirova.
Oblysta 217 tekserý júrgizilgen. Onyń 51-i tikeleı tutynýshylardyń quqyqtaryn qorǵaý máselelerine qatysty.
Eske sala keteıik, SQO-da tutynýshylardan túsken shaǵymdar sany shamamen eki esege artqan.