Pavlodar oblysynda tutynýshylardyń 32 mln teńgeden asa qarajaty qaıtaryldy
PAVLODAR. KAZINFORM — Óńir turǵyndary saýda jáne tutynýshylardyń quqyqtaryn qorǵaý departamentine júgingennen keıin taýar nemese qyzmet úshin tólengen aqshasyn qaıtaryp ala alǵan. Kóp jaǵdaıda tutynýshylarǵa óz quqyǵyn sotta dáleldeýge týra kelgen.
Oblystyq saýda jáne tutynýshylardyń quqyqtaryn qorǵaý departamentinen habarlaǵandaı, jyl basynan mekemege 931 ótinish túsken. Shaǵymdar sany ótken jylmen salystyrǵanda 28%-ǵa óskeni baıqalyp otyr.
— Ótinishterdi qaraý qorytyndysy boıynsha tutynýshylarǵa 32 mıllıon teńgeden astam qarajat qaıtaryldy. Sonymen qatar, sot sheshimderimen azamattardyń paıdasyna 25,5 mıllıon teńgeden astam qarajat óndirildi. Taldaý kórsetkendeı, eń problemalyq salalar kelesideı: bólshek saýda — ótinishterdiń 49,8%-y; turmystyq qyzmet kórsetý — 16,7%; elektrondyq saýda — 15,5%, — dep atap ótti departamentten.
Buǵan qosa kásipkerlerdiń turǵyndardan túsken shaǵymdardy qaraý talaptaryn saqtamaýy quqyqbuzýshylyqtyń eń kóp taralǵan túri bolyp otyr. Kásipkerler taýardy aıyrbastaýdan nemese qaıtarýdan bas tartady, taýarlardy vıtrınada kórsetilgen baǵadan qymbatqa satady. Al keıbir satyp alýshylar taýar baǵasynyń kórsetilmeýine shaǵymdanǵan.
Tutynýshylardy taýardyń sıpattamalary men sapasy boıynsha jańylystyrǵan jaıttar da kezdesken. Taǵy bir satýshylar áleýmettik mańyzy bar azyq-túlik taýarlaryna shekti ruqsat etilgen saýda ústemesin jıi asyryp jibergen.
Jyl basynan saýda qyzmetin retteý týraly zańnamany buzýdyń 80 deregi anyqtaldy. 75 kásipkerge jalpy somasy 2,2 mıllıon teńgeden astam aıyppul salynǵan.
Eske sala keteıik, elimizde tutynýshylardyń 400 mıllıon teńgeden astam qarajaty qaıtaryldy.
