Pavlodar oblysynda turǵyn úılerdi jylýǵa qosý aıaqtalyp qaldy

PAVLODAR. KAZINFORM — Qazirgi ýaqytta Aqsý qalasyndaǵy barlyq turǵyn úıler jylýǵa qosylǵan. Al Pavlodar men Ekibastuzda jylý berý sharalary erteńge deıin aıaqtalýy kerek.

Úsh qaladaǵy áleýmettik nysandardyń barlyǵy búginde jylýmen tolyq qamtylǵan. Aqsý qalalar arasynda eń alǵashqy bolyp barlyq áleýmettik mekemelerdi jáne úılerdi jylýǵa qosty. 

Qazirgi sátte Pavlodar qalasyndaǵy 1300 kóppáterli úıdiń tek 21-ine ǵana jylý kirmegen. 

«Bul úılerdiń syrtqy jáne ishki jelilerinde apattyq jaǵdaılar anyqtalǵany sebepti jylý kesh berilip jatyr. Jóndeý jumystary júrgizilip, jylýmen qamtý mekemesiniń qyzmetkerleri gıdravlıkalyq jáne temperatýralyq rejımdi retteý ústinde. Búgin keshke deıin barlyq úılerde jylý bolady dep kútip otyrmyz. Negizi jylý berýdi 9 qyrkúıekte bastap ketken edik. Bastapqy bette áleýmettik nysandar qamtyldy», -dep habarlady qala ákiminiń baspasóz qyzmetinen.

Al Ekibastuz qalalyq turǵyn úı ınspektsııasy bóliminiń basshysy Álibek Baıdildın shaharda 300-den astam kópqabatty turǵyn úı jylýǵa qosylyp úlgergenin málimdedi. Qalada jalpy sany 700 turǵyn úı jáne 6 myńnan astam jer úıler ornalasqan. Jer úılerdiń ortalyq jylý kózine qosylýyna úı ıeleri ózderi jaýaptanady. Mundaǵy jylýǵa qosý jumystary aldaǵy eki kúnde tolyq aıaqtalady dep josparlanyp otyr.

Aqsý qalasy bıyl jylýǵa qosý sharalaryn alǵashqy bolyp támamdady. Qalalyq ishki saıasat bóliminiń basshysy Ásemgúl Rakımova 16 qyrkúıekten bastap áleýmettik nysandarǵa, 23 qyrkúıekten turǵyn úılerge jylý jiberilgenin aıtady. Metallýrgter shaharynda 265 turǵyn úı men 44 áleýmettik nysan bar.

Buǵan deıin Pavlodar qalasyna 9 qyrkúıekte jylý berile bastaıtynyn habarlaǵanbyz.

Bıyl QR Úkimeti Pavlodar, Ekibastuz jáne Aqsý qalalarynda jylý jelilerin salýǵa 9 mlrd teńge bóldi.

Al Klebanov pen Kan Ekibastuz JEO-syn qala bıligine ótkizip berdi.