Pavlodar oblysynda turatyn soǵys ardagerlerine 5 mln teńgeden beriledi

PAVLODAR. KAZINFORM -Ertis-Baıan óńiriniń aýmaǵynda búginde kózi tiri 7 qart maıdanger turyp jatyr. Olardyń eń úlkeni – 101 jasta.

Uly Otan soǵysyndaǵy Jeńistiń 80 jyldyǵyn merekeleý aıasynda óńirdegi soǵys ardagerlerine 5 mln teńgeden tóleý maqsat etilip otyr.

- Qazirgi ýaqytta oblysta Uly Otan soǵysynyń 7 ardageri turady. Eń qart ardager Kýrbatova Marııa Danılovna 101 jasqa tolsa, eń jasy 97 jastaǵy Stýpka Nıkolaı Andreevıch. Buǵan qosa, Jeńiske qol jetkizýge úles qosqan 3,7 myńnan astam azamatqa merekelik jáne ataýly kúnderge birjolǵy tólemder qarastyrylǵan. Bul tólemder mártebesine baılanysty 50 myń teńgeden 200 myń teńgege deıin ulǵaıtyldy, - dep habarlady óńirlik Jumyspen qamtýdy úılestirý jáne áleýmettik baǵdarlamalar basqarmasynan.

Tyl eńbekkerlerine tólem 100 myń teńgeni, Lenıngrad qorshaýynda bolǵandarǵa – 150 myń, kámeletke tolmaǵan shaǵynda kontslagerlerde bolǵan tutqyndarǵa 200 myń teńgeni qurap otyr.

Eske sala keteıik, Pavlodarda Ulttyq ulan orkestri ǵasyr jasaǵan soǵys ardagerine mereke syılady.