Pavlodar oblysynda taksı júrgizýshi zeınetkerdi alaıaqtardan qutqaryp qaldy

ASTANA. KAZINFORM — Pavlodarlyq zeınetker ózin energoortalyqtyń qyzmetkerimiz dep tanystyrǵan alaıaqtardyń arbaýyna túse jazdady, dep habarlaıdy Polisia.kz.

Eseptegishti tekserý jáne plombalaý júrgiziledi degen sózge sengen áıel jiberilgen siltemeler arqyly ótip, qylmyskerlerge 8,5 mln teńge bermek bolǵan.

Alaıaqtar aldymen zeınetkerge qońyraý shalyp, ózderin energokompanııa qyzmetkerleri retinde tanystyrǵan. Olar eseptegishke tekserý júrgizý úshin servısten kelgen kodty aıtý qajet ekenin jetkizgen. Kúmándanbaǵan áıel atalǵan kodty habarlaǵan. Arada biraz ýaqyt ótken soń oǵan ózin bank qyzmetkeri retinde tanystyrǵan belgisiz tulǵalar habarlasyp, alaıaqtar onyń aqshasyn ıemdenbek bolyp jatqanyn aıtyp, qarajatty «qaýipsiz shotqa» aýdarý qajettigin jetkizgen. Sonymen qatar sol kúni kýrer kelip, aqshany alyp ketetini de aıtylǵan.

Zeınetker oılanbastan esepshotynan 8,5 mln teńge sheship alyp, ári qaraıǵy nusqaýlardy kútken. Keıin qońyraý shalǵandar aqshany taksı júrgizýshi arqyly berý kerektigin tapsyrǵan.

— Qazir alaıaqtyq faktisi boıynsha qylmystyq is qozǵaldy. Kúdiktilerdi anyqtaý jáne ustaý baǵytynda jedel is-sharalar júrgizilip jatyr, — deıdi Pavlodar oblysy polıtsııa departamenti kıberqylmysqa qarsy is-qımyl basqarmasynyń bastyǵy Ashat Abetjanov. 

Alaıda alaıaqtardyń jospary taksı júrgizýshiniń qyraǵylyǵynyń arqasynda júzege aspaı qaldy.

— Keshki ýaqytta maǵan bir «sálemdemeni» alyp ketý jóninde tapsyrys tústi. Barsam, jóneltýshi jasy úlken ájeı eken. Ne berip jatqanyn, kimge tapsyratynyn suraǵanymda, naqty jaýap bere almady, qatty abyrjyp turdy. Kúdiktenip, ájeıdi taksıge otyrǵyzyp, polıtsııa pýnktine apardym. Buǵan deıin polıtsııa qyzmetkerleri osyndaı alaıaqtyq shemalar týraly eskertken edi, — deıdi taksı júrgizýshi Alekseı Bortovoı.

Pavlodar qalasynyń turǵyny Galına Andreevna polıtsııanyń jedel áreketteri men taksı júrgizýshiniń qyraǵylyǵynyń arqasynda iri kólemdegi alaıaqtyqtyń aldyn alyp, aqshasyn saqtap qalǵanyn aıtty.

Polıtsııa azamattardy taǵy da barynsha saq bolýǵa shaqyrady. Eshbir memlekettik organ nemese bank qarajatty «saqtaýǵa» almaıdy jáne kýrer jibermeıdi. Mundaı sıpattaǵy kez kelgen qońyraý — alaıaqtyq ekenin esten shyǵarmaǵan jón.

Budan buryn ańǵal ájeı depozıttegi 24 mln teńgesin sheship alyp, alaıaqtarǵa bermekshi bolǵanyn jazǵanbyz.