Pavlodar oblysynda sport nysandaryn zańsyz paıdalanylyp, bıýdjetke mıllıondaǵan shyǵyn keltirilgen

ASTANA. KAZINFORM – Pavlodardyń sport mektepterinde urlyq pen jalǵan tólemder anyqtaldy. 

Prokýratýra óńirdegi sport nysandaryn stadıondar, basseınder, sport mektepteri, muzaıdyndary men fýtbol manejderin tekserdi.

Sporttyq qurylystardyń zańsyz túrde jeke tulǵalardyń ıeligine berilgeni anyqtaldy. Atalǵan nysandar kommertsııalyq maqsatta paıdalanylyp, jaldaý aqysy tólenbegen.

Mysaly, Pavlodar qalasynda hokkeı korty úsh jyl boıy tegin paıdalanylyp, al kommýnaldyq shyǵyn bıýdjet qarajaty esebinen ótelgen.

— Sport mektepteriniń qyzmetinde 10 mln teńge somasyna urlyq jáne jalǵan tólemder faktileri anyqtaldy. Atap aıtqanda, bir aýdanda býhgalter úsh jyl ishinde ózine zańsyz túrde shamamen 6 mln teńge aýdarǵan. QK-niń 189-baby 3-bóligi boıynsha qylmystyq is sotta qaralyp jatyr, — delingen habarlamada.

Sport uıymdarynda jalǵan dıplomdary bar jattyqtyrýshylar, sondaı-aq buryn halyq densaýlyǵyna jáne ımandylyqqa qarsy qylmys úshin qylmystyq jaýaptylyqqa tartylǵan qyzmetkerlerdiń jumys istegeni anyqtaldy.

— Sportshylardy joq qonaqúılerge ornalastyrý boıynsha jalǵan sharttar jasalǵan. Onyń saldarynan keltirilgen zalal 2,8 mln teńge boldy, — delingen prokýratýra habarlamasynda.

Tekserý nátıjeleri sport nysandarynyń basym bóliginiń tozǵan kúıde ekenin kórsetti: trıbýnalar qıraǵan, shatyrdan sý aǵyp tur, múgedektigi bar adamdarǵa jaǵdaı jasalmaǵan, sanıtarlyq jáne órt qaýipsizdigi talaptaryna saı emes.

Atalǵan barlyq zań buzý boıynsha olardy joıý jáne kináli tulǵalardy jaýapkershilikke tartý maqsatynda qadaǵalaý aktileri engizildi.