Pavlodar oblysynda sarqyndy sý tarıfteri 28 %-ǵa deıin tómendeıdi
PAVLODAR. KAZINFORM - Pavlodar oblysynyń Baıanaýyl aýdanynda sarqyndy sýlardy burý qyzmetiniń tarıfteri 2027 jylǵy 1 qańtardan bastap arzandaıtyny belgili boldy. Jeke tutynýshylar úshin 18 %, ózge tutynýshylar sanaty úshin baǵa 28,24 paıyzǵa deıin tómendeıdi.
Tabıǵı monopolııalardy retteý komıtetiniń Pavlodar oblysy boıynsha departamenti «Baıanaýyl sý arnasy» memlekettik kommýnaldyq kásipornynyń 2025 jylǵa bekitilgen tarıftik smetasynyń oryndalýyna taldaý júrgizgen.
- Taldaý qorytyndysy kórsetkendeı, kásiporynnyń negizsiz alǵan kirisiniń jalpy somasy (Ulttyq banktiń bazalyq mólsherlemesi eskerile otyryp) - 1 mln 952,7 myń teńge. Osyǵan baılanysty departament 2026 jylǵy 18 qarashadaǵy buıryǵymen kásiporynǵa 2027 jylǵa ýaqytsha ótemdik tarıfter bekitti. Jańa tarıfter keler jyldyń 1 qańtarynan bastap kúshine enedi, - dep habarlady departamentten.
Atap aıtqanda, sarqyndy sýlardy burý qyzmetiniń ortasha tarıfi bir tekshe metrine 68,32 teńge bolyp belgilendi. Bul burynǵy baǵadan 15,23 teńgege nemese 18,23 %-ǵa tómen.
Jeke turǵyndarǵa jáne jylý energııasyn óndirý, berý, bólý, sondaı-aq sýmen jabdyqtaý, sý burý salasynda rettelip kórsetiletin qyzmetterdi usynatyn uıymdarǵa arnalǵan tarıf - 64,40 teńge. Burynǵy baǵamen salystyrǵanda 14,12 teńgege nemese 17,98 %-ǵa azaıady.
Ózge tutynýshylar úshin tarıf bir tekshe metrine 72,22 teńge bolyp bekitildi. Tómendeý mólsheri – 16,11 teńge nemese 18,23 %.
Al bıýdjet qarajaty esebinen ustalatyn uıymdar úshin tarıf 98,47 teńgege deıin túsirildi. Bul – burynǵy tarıften 38,76 teńgege nemese 28,24 %-ǵa tómen.
Jańa tarıfter 2027 jylǵy 1 qańtardan 31 jeltoqsanǵa deıin qoldanylady.
Buǵan deıin Petropavlda sý tarıfi ózgerýi múmkin ekenin jazǵanbyz.